Den gheheelen Bybel, Inhoudende het oude ende nieuwe Testament (Leuvense bijbel 1548)



Den .C.xlvi. Psalm. Laudate Dominum.
1 LOuet den Heere want goet is den lofsanc onsen Godt, latet den lof blijde ende schoon wesen.
2 Die Heere Ierusalem timmerende sal, die verstroytheden van Israel vergaderen.
3 Die gheneest die ghene die heel ghebroken van herten sijn, ende verbint hen quetsueren.
4 Die de menichte der sterren telt, ende die alle by namen noemende is.
5 Groot is onse Heere, ende groot is sijn macht, ende sijnder wijsheyt en is gheen ghetal.
6 Die Heere is ontfanghende die saechtmoedighe, maer vernederende die sondaers totter eerden toe.
7 Singht den Heere voor in belijdinghe, singhet hem lof op die herpe.
8 Die den hemel bedect met wolcken ende bereydt der eerden reghen. Die gras voortbrengt op die berghen, ende cruyt ten dienst der menschen.
9 Die den beesten hen spijse gheeft, ende der rauen ionghen die hem aenroepen.
10 Hy en sal in die stercheyt des peerts gheenen lust hebben, noch in eens mans beenen en sal hy gheen behaghen hebben.
11 Die Heere heeft behaghen op die ghene die hem vreesen, ende aen die ghene die hopen op sijn bermherticheyt.