Den gheheelen Bybel, Inhoudende het oude ende nieuwe Testament (Leuvense bijbel 1548)

Den .C.xl. Psalm.

Domine clamaui.

1

HEre ick heb gheroepen tot v, verhoort my, luystert na mijn stemme, als ic tot v roepen sal.

2

Laet mijn ghebedt ghestiert worden ghelijck eenen rueckoffer in v aensicht, dat opheffen mijnder handen laet wesen als een auonts sacrificie.

3

Stelt Heere een hoede mijnen monde, ende een doore des omstants mijnen lippen.

4

En neycht mijn herte niet aff tot die woerden der quaetheyt, om te ontsculdighen die ontsculden in die sonden.

Metten menschen die boosheyt doen, ende ic en sal gheen ghemeynscap houden met hen wtuercorenen.

5

Die rechtuerdighe sal my straffen in bermherticheden, ende my berispen, maer die olie des sondaers en sal mijn hooft niet vet maken.

Want mijn ghebedt is noch in hen wel behaghen,

6

hen rechters ghevoecht aen den steen sijn verslonden.

Sij sullen mijn woerden hooren, want sij vermochtent,

7

ghelijck die vetticheyt der aerden wtgheborsten es op der aerden.

Alsoo sijn onse beenderen verstroyt omtrent der hellen,

8

want tot v o Heere Heere sijn mijn ooghen, in v heb ic ghehoept, en neemt mijn ziele niet wech.

9

Bewaert my vanden stricke den welcken sij my gheleyt hebben, ende van die struycselen der gheender die boosheyt doen.

10

In sijn nette sullen die sondaers vallen, versceyden ben ick tot dat ick voerbij gae.