Den gheheelen Bybel, Inhoudende het oude ende nieuwe Testament (Leuvense bijbel 1548)

Den .C.xxix. Psalm.

De profundis.

1

VVt die diepten heb ick gheroepen tot v Heere,

2

Heere verhoort mijn stemme.

Laet v ooren luysterende wesen, nae die stemme mijns biddens.

3

Eest dat ghy die boosheden gadeslaet Heere, Heere wie salt verdraghen.

4

Want by v is versoeninghe, ende om v wet heb ick v Heere verdraghen.

Mijn ziele heeft verdraghen in sijn woert,

5

mijn ziele heeft ghehoept inden Heere.

6

Van die morghen hoede totten nacht toe, soe laet Israel inden Heere hopen.

7

Want by den Heere es bermherticheyt, ende by hem is seer ouervloedeghe verlossinghe.

8

Ende hy sal Israel verlossen, van alle zijn boosheden.