Den gheheelen Bybel, Inhoudende het oude ende nieuwe Testament (Leuvense bijbel 1548)

Den .C.xx. Psalm.

Leuaui oculos meos.

1

ICk heb mijn ooghen opghehauen tot die berghen van waer mijn helpe comen sal.

2

Mijn helpe is vanden Heere die hemel ende eerde ghemaect heeft.

3

Hy en gheue uwen voet niet tot slipperen, noch hy en slape niet die v bewaert.

4

Siet hy en sal niet sluymeren noch slapen, die Israel bewaert.

5

Die Heere bewaert v, die Heere is v bescermen op v rechte hant.

6

Des daechs en sal v die sonne niet branden, noch die mane des nachts.

7

Die Heere bewaert v van alle quaet, die Heere beware v ziele.

8

Die Heere beware uwen inganck ende wtganck, van nu aen ende tot inder eewicheyt.