Den gheheelen Bybel, Inhoudende het oude ende nieuwe Testament (Leuvense bijbel 1548)

(2008)–Anoniem Leuvens bijbel 1548– rechtenstatus



Den .C.xviij. Psalm. Aleph. Beati immaculati.
1 SAlich sijn sij die ombesmet sijn inden wech, die wandelen in die wet des Heeren.
2 Salich sijn sij die sijn ghetuyghenisse ondersoecken, die met gheheelder herten hem soecken.
3 Want die ghene die boosheyt doen, en hebben in sijn weghen niet ghewandelt.
4 Ghy hebt beuolen v gheboden te onderhouden, wter maten seere.
5 Och oft mijn weghen ghescict worden, om te onderhouden v rechtuerdichmakinghen.
6 Dan en sal ick niet bescaemt worden, als ick wel doersien sal alle uwe gheboden.
7 Ick sal v belijden in die bescickinghe des herten, om dat ick gheleert hebbe die rechte ordeelen van uwer rechtuerdicheyt.
8 V rechtuerdichmakinghen sal ick bewaren, en wilt my niet verlaten teenemale. Beth. In quo corrigit.
9 VVaer in sal een ionghelinck sijnen wech beteren? in te bewaren uwe woerden.
10 In alle mijn herte heb ick v ghesocht, en wilt my niet verstooten van uwe gheboden.
11 In mijn herte heb ick v wtspraken gheborghen, op dat ick v niet sondighen en soude.
12 Ghebenedijt sijdi Heere, leert my v rechtuerdichmakinghen.
13 Met mijn lippen heb ick wtghesproken, alle die vonnissen ws monts.
14 Inden wech van uwen ghetuyghenissen heb ick ghenoechte ghehadt, ghelijck in allen rijcdommen.
15 In uwe gheboden sal ic gheoeffent worden, ende bemerken v weghen.
16 In v rechtuerdichmakinghen sal ic my oeffenen, ende ick en sal v woerden niet vergheten. Gimel. Retribue.
17 VErgheldet uwen knecht, maect my leuende ende ick sal v woerden bewaren.
18 Ontdect mijn ooghen, ende ick sal aenmercken die wonderlijcheden van uwer wet.
19 Een aencomelinck ben ick op die eerde, en wilt van my niet verborghen uwe gheboden.
20 Mijn ziele heeft lust ghehadt om te begheren uwe gheboden, tot allen tijden.
21 Ghy hebt die houerdighe ghestraft, vermalendijt sijn sij die aff wijcken van uwen gheboden.
22 Neemt van my het verwijt ende die versmaetheyt, want ick heb v ghetuyghenissen ondersocht.
23 Want voerwaer die princen hebben gheseten, ende spraken teghen my, maer v dienaer worde gheoeffent in uwe rechtuerdichmakinghen.
24 Want oock v ghetuyghenissen sijn mijn ouerpeysinghe, ende v rechtuerdichmakinghen sijn mijnen raet. Daleth. Adhesit.
25 MYn ziele heeft ghecleeft aent pauiment, maect my leuende nae v woert.
26 Mijn weghen heb ick wtghesproken ende ghy hebt my verhoort, leert my uwe rechtuerdichmakinghen.
27 Den wech van uwer rechtuerdichmakinghen leert my, ende ick sal gheoeffent worden in uwe wonderlijcheden.
28 Mijn ziele heeft ghesluymert van verdriet, vesticht my doer v woerden.
29 Den wech der boosheyt doet wech van my, ende van uwer wet ontfermt v mijnder.
30 Den wech der waerheyt heb ick ghecoren, v ordeelen en heb ick niet vergheten.
31 Ick heb uwen ghetuyghenissen aenghehanghen Heere, en wilt my niet bescamen.
32 Den wech van uwen gheboden heb ick gheloopen, als ghy mijn herte verbreydde. He. Legem pone.
33 HEere stelt my voer een wet den wech van uwer rechtuerdichmakinghen, ende ick sal dien soecken tot allen tijden.
34 Gheeft my verstant, ende ick sal v wet doersoec-
[pagina *484]
ken, ende ick sal die bewaren in mijn gheheel herte.
35 Leyt my voerts inden padt van uwen geboden, want die heb ick ghewilt.
36 Neycht mijn herte tot uwe ghetuyghenissen, ende niet tot die ghiericheyt.
37 Keert mijn ooghen dat sij gheen ydelheyt en sien, in uwen wech maect my leuende.
38 Stelt uwen knecht v woert, in uwer vreesen.
39 Keert aff mijn verwijt dat ick vermoedt hebbe, want v ordeelen sijn ghenoechelijck.
40 Siet ick heb begheert v gheboden, in uwe rechtuerdicheyt maect my leuende. Vau. Et veniat.
41 ENde laet op my comen v bermherticheyt Heere, v salicheyt nae uwe redene.
42 Ende ick sal een woert antwoerden den ghenen die my bescimpen, want ick heb in uwe woerden ghehoept.
43 Ende en neemt van my niet wech dat woert der waerheyt alte male, want in v ordeelen heb ick seer ghehoept.
44 Ende ick sal v wet altijt bewaren, emmermeer ende in die eewicheyt der eewicheden.
45 Ende ick heb ghewandelt in die breetheyt, want ick heb v gheboden ondersocht.
46 Ende ick sprack van uwen ghetuyghenissen in daenschijn der coninghen, ende ick en worde niet bescaemt.
47 Ende ick oeffende mijn ghedachte in uwe gheboden die ick bemint hebbe.
48 Ende ick heb mijn handen opghehauen tot uwen gheboden, die ick bemint hebbe, ende ick sal my oeffenen in uwe rechtuerdichmakinghen. Zain. Memor esto.
49 VVeest ghedachtich ws woerts tot behoef uwen knechte daer in dat ghi my hope ghegheuen hebt.
50 Dese heeft my ghetroost in mijn ootmoedicheyt, want v wtsprake heeft my leuende ghemaect.
51 Die hoouerdighe deden booslijck ouer al, maer van uwer wet en ben ick niet affgheweken.
52 Ic heb ghedachtich gheweest uwer ordeelen van tbeghin der werelt Heere, ende ick ben vertroost gheworden.
53 Een beswijmelinghe heeft my beuanghen, om die sondaers die v wet verlaten.
54 Singhelijcke liedekens waren my v rechtuerdichmakinghen, in die plaetse van mijnder pelgrimagien.
55 Ick heb des nachts ghedachtich gheweest o Heere ws naems, ende ick heb v wet bewaert.
56 Dese es mijne gheworden, om dat ick v rechtuerdichmakinghen versocht hebbe. Heth. Portio mea.
57 HEere ick heb gheseyt, tis mijn deel, dat ick v wet beware.
58 Ick heb v aensicht ghebeden in alle mijn herte, ontfermt v mijnder nae wtsprake.
59 Ick heb ghedacht op mijn weghen, ende ick heb mijn voeten omme ghekeert in uwe ghetuyghenissen.
60 Ick ben bereydt ende niet verstoort, om v gheboden te onderhouden.
61 Die banden der sondaren hebben my omuanghen, ende v wet en heb ick niet vergheten.
62 Ter middernacht stont ick op om v te belijden, van die ordeelen uwer rechtuerdichmakinghe.
63 Deelachtich ben ick alle der gheender die v vreesen, ende die v gheboden bewaren.
64 Van uwer bermherticheyt Heere es die eerde vol, v rechtuerdichmakinghen leert my. Teth. Bonitatem.
65 GOetheyt hebdi met uwen knecht ghedaen Heere, nae v woert.
66 Goetheyt ende leeringhe, ende wetentheyt leert my, want ick heb uwen gheboden ghelooft.
67 Eer ick verootmoedicht werde, soe heb ick misfaen, daer om heb ick v woerden bewaert.
68 Goet sijdi, ende in v goetheyt leert my v rechtuerdicmakinghen.
69 Vermenichfuldicht es op my die boosheyt der hoouerdigher, maer ick sal in mijn gheheel herte ondersoecken v gheboden.
70 Hen herte is gheronnen als melck, maer ick heb v wet ouerpeyst.
71 Tes my goet dat ghy my verootmoedicht hebt, dat ick mach leeren v rechtuerdichmakinghen.
72 Beter is my die wet ws monts, bouen dusenden van gout ende siluer. Iod. Manus.
73 VVe handen hebben my ghemaect ende gheformet, gheeft my verstandt, dat ick v gheboden leere.
74 Die v vreesen sullen my sien, ende blijde sijn, om dat ick in v woerden zeer ghehoept hebbe.
75 Ick heb bekent Heere dat v ordeelen gherechticheyt sijn, ende in uwe waerheyt hebdi my verootmoedicht.
76 Laet v bermherticheyt ghescieden dat sij my vertrooste, nae v woert uwen dienaer.
77 Laet v bermherticheden tot my comen, ende ick sal leuen, want v wet is mijn diepe aendachticheyt.
78 Laet die hoouerdighe bescaemt worden, want sij hebben tonrechte teghen my boosheyt bedreuen, maer ick sal gheoeffent worden in uwe gheboden.
79 Laetse tot my ghekeert worden die v vreesen, ende die v ghetuyghenissen kennen.
80 Laet mijn herte onbesmet worden in v rechtuerdichmakinghen, dat ick niet bescaemt en worde. Caph. Defecit.
81 MYn ziele is besweken in v salicheyt, ende in v woert heb ick zeere ghehoept.
82 Mijn ooghen sijn besweken in v woert segghende, wanneer suldi my vertroosten?
83 Want ick ben gheworden als een leeren flessche inden rijm, v rechtuerdichmakinghen en heb ic niet vergheten.
84 Hoe veel sijn die daghen ws dienaers, wanneer suldi vanden ghenen die my veruolghen ordeel doen?
85 Die boose hebben mij clappernien vertelt, maer niet als v wet.
86 Alle v gheboden sijn waerachticheyt, die boose hebben my veruolcht, helpt my.
87 Seer by nae hebben sij my verslonden op die aerde, maer ick en heb v gheboden niet ghelaten.
88 Nae uwe bermherticheyt maect my leuende, ende ick sal bewaren die ghetuyghenissen ws monts. Lamed. Ineternum Domine.
89 INder eewicheyt Heere blijft v woert inden hemel.
90 Van gheslachte tot gheslachte is waerheyt, ghy hebt die eerde vast ghemaect, ende sij blijft altijt.

[pagina *485]
91 Doer v ordinancie duert den dach, want alle dinghen dienen v.
92 Ten waer sake dat v wet mijn diepe aendachte ware, soe ware ic bij auontueren vergaen in mijn ootmoedicheyt.
93 Inder eewicheyt en sal ick niet vergheten v rechtuerdichmakinghen, want in die selue hebdi my leuende ghemaect.
94 Vwe ben ick, maect my salich, want uwe rechtuerdichmakinghen heb ick versocht.
95 My hebben die sondaers verbeyt, om dat sij my verdoen souden, uwe ghetuyghenissen heb ick verstaen.
96 Van alle volcomenheyt heb ic een eynde ghesien v ghebodt is breedt bouen maten. Mem. Quomodo.
97 HOe seere heb ick v wet bemint Heere? den gheheelen dach es sij mijn aendachte.
98 Bouen mijn vianden hebdi my wijs ghemaect met v ghebodt, want het is inder eewicheyt mijne.
99 Bouen alle die mij leerden heb ick verstaen, om dat v ghetuyghenissen mijn aendachte sijn.
100 Bouen die ouders heb ick verstant ghehadt, om dat ick v gheboden ghesocht hebbe.
101 Van allen quaden weghe heb ick mijn voeten bedwonghen, om dat ick v woerden bewaren soude.
102 Van uwen ordeelen en heb ic niet affgheweken, want ghy hebt my een wet ghestelt.
103 Hoe suet sijn mijnen kaken v woerden, bouen honich mijnen monde?
104 Van uwen gheboden heb ick verstant ghehadt, daer om heb ic ghehaet alle die weghen der boosheyt. Nun. Lucerna.
105 EEn lichtvat mijnen voeten es v woert, ende een licht mijnen paden.
106 Ick hebt ghesworen ende een vast opset ghemaect, te bewaren die ordeelen uwer rechtuerdicheyt.
107 Ick ben in allen sijden verootmoedicht Heere, maect my leuende nae v woert.
108 Die vrijwillighe offeranden mijns monts maect behaechlijck Heere, ende v ordeelen leert my,
109 mijn ziele es in mijn handen altijt, ende v wet en heb ick niet vergheten.
110 Die sondaers hebben my eenen strick ghestelt, ende van uwen gheboden en heb ick niet ghedoelt.
111 Tot een erffenisse heb ick vercreghen v ghetuyghenissen inder eewicheyt, want sij sijn mijns herten verhueghen.
112 Ick heb mijn herte gheboocht om te doen uwe rechtuerdichmakinghen inder eewicheyt, om den wederloon. Samech. Iniquos odio.
113 DIe boose heb ick ghehaedt, ende v wet heb ick bemint.
114 Ghy sijt mijn helper ende ontfangher, ende in v woert heb ic zeer ghehoept.
115 Wijct van my aff ghy quaet willighe, ende ick sal ondersoecken die gheboden mijns Godts.
116 Ontfanct my nae v woert ende ick sal leuen, ende en bescaempt my niet van mijnen verwachten.
117 Helpt my, ende ick sal salich wesen, ende ick sal mijn ghedachten in uwe rechtuerdichmakinghen altijt oeffenen.
118 Ghy hebt versmaet alle die ghene die afsceyden van uwen ordeelen, want onrechtuerdich is hen ghepeys.
119 Voer ouertreders heb ick ghehouden alle die sondaers der aerden, daer om heb ick v ghetuyghenissen bemint.
120 Doersteect mijn vleesch met uwer vresen, want van uwen ordeelen heb ick ghevreest. Ain. Feci iudicium.
121 ICk heb ordeel ende rechtuerdicheyt ghedaen, en leuert my niet den ghenen die my belieghen.
122 Ontfanct uwen dienaer int goede, en laet die hoouerdighe my niet belieghen.
123 Mijn ooghen sijn besweken in uwe salicheyt, ende in dwoerdt van uwer rechtuerdicheyt.
124 Doet uwen dienaer nae uwe bermherticheyt, ende v rechtuerdichmakinghen leert my.
125 V dienaer ben ick gheeft my verstant, dat ic weten mach v ghetuyghenissen.
126 Tes tijt dat ghijt doet Heere, sij hebben v wette niet ghebracht.
127 Daer om heb ick v gheboden bemint bouen gout ende topazion steen.
128 Daer om worde ick tot allen uwe gheboden ghescict, alle quade weghen heb ick ghehaet. Phe. Mirabilia.
129 VVonderlijck sijn v ghetuyghenissen, daer om heeftse mijn ziele ondersocht.
130 Die verclaringhe van uwen woerden verlicht, ende gheeft verstant den cleynen kinderen.
131 Mijnen mont heb ick open ghedaen ende adem inghehaelt, want uwe gheboden begheerde ick.
132 Siet my aen ende ontfermt v mijnder, nae dat ordeel der gheender die uwen naem lief hebben.
133 Mijn ganghen bescict nae v woert, ende en laet gheen heerschappie ouer my hebben eenighe onrechtuerdicheyt.
134 Verlost my van der menschen versierde loghenen dat ick v gheboden onderhoude.
135 V aensicht verlicht op uwen knecht, ende leert my rechtuerdichmakinghen.
136 Mijn ooghen hebben water vloeden voertsbracht om dat sij v wet niet bewaert en hebben. Phe. Mirabilia.
137 REchtuerdich sijdi Heere, ende recht es v ordeel.
138 Ghy hebt beuolen die rechtuerdicheyt uwe ghetuyghenissen, ende v waerheyt wtermaten seere.
139 Mijn Ialoursheyt heeft my doen verdwijnen, om dat mijn vianden uwe woerden vergheten hebben.
140 V woert is seer vierich, ende v knecht heeft dat bemint.
141 Ick ben een ionghelinck, ende versmaet, v rechtuerdichmakinghen en heb ick niet vergheten.
142 V rechtuerdicheyt, is een rechtuerdicheyt inder eewicheyt, ende v wet is die waerheyt.
143 Verdructheyt ende benautheyt hebben my vonden, v gheboden sijn mijn aendachte.
144 Gberechtichticheyt sijn v ghetuyghenissen inder eewicheyt, gheeft my verstant ende ick sal leuen. Coph. Clama ui
145 IC heb geroepen in al mijn gheheel herte, verhoort my Heere v rechtuerdichmakinghen sal ick soecken.
146 Ick heb tot v gheroepen maect my salich, dat ick bewaren mach uwe gheboden.
147 Ick heb den vroeghen morghenstont voerghe-
[pagina *486]
comen ende ick heb gheroepen, want in uwe woerden heb ick seer ghehoept.
148 Mijn ooghen sijn tot v voer ghecomen inden dagheraert, dat ick v woerden bedencken soude.
149 Hoort mijn stemme nae uwe bermherticheyt Heere, ende nae v ordeel maect my leuende.
150 Die my veruolghen hebben ghenaect der boosheyt, maer van uwer wet zijn sij verre gheworden.
151 Heere ghy sijt by my, ende allen v weghen sijn warachticheyt.
152 Vanden beghinsel heb ick gheweten van uwen ghetuyghenissen, dat ghy die inder eewicheyt ghefundeert hebt. Res. Vide humilitatem.
153 SIet mijn vernederinghe, ende verlost my, want v wet en heb ick niet vergheten.
154 Ordeelt mijn ordeel ende verlost my, om uwe woerden maect my leuende.
155 Verre es van den sondaers die salicheyt, want uwe rechtuerdichmakinghen en hebben zij niet ghesocht.
156 V bermherticheden sijn vele Heere, nae v ordeel soe maect my leuende.
157 Veel esser die my veruolghen ende quellen, van uwen ghetuyghenissen en ben ick niet affgheweken.
158 Ick heb die ouertreders ghesien ende ick verdwijnde, om dat sij v woerden niet bewaert en hebben.
159 Siet dat ick v gheboden ghehouden heb Heere, in v bermherticheyt maect my leuende.
160 Tbeghinsel van uwen woerden is die warachticheyt, inder eewicheyt sijn alle die vonnissen uwer rechtuerdicheyt. Sin. Principes.
161 DIe princen hebben my veruolcht sonder sake, ende van uwen woerden heeft mijn herte ghevreest.
162 Ick sal blijde sijn op uwe wtspraken, ghelijck die eenen grooten roof vint.
163 Die boosheyt heb ick ghehaedt, ende verfoeyt, maer v wet heb ick lief ghehadt.
164 Seuen werff sdaechs heb ick v loff gheseyt, van die ordeelen uwer rechtuerdicheyt.
165 Veel vreedts is den ghenen die v wet beminnen, ende sij en hebben gheen verargheringhe.
166 Ick verwachte v salicheyt Heere, ende v gheboden heb ick bemint.
167 Mijn ziele heeft v ghetuyghenissen bewaert, ende die seer bemint.
168 Ick heb bewaert v gheboden ende ghetuyghenissen, want alle mijn weghen zijn in v aenscouwen. Thau. Appropinquet.
169 LAet mijn bedinghe ghenaken voer v aensicht Heere, nae v wtsprake gheeft my verstant.
170 Laet mijn begheerte comen voer v aensicht, nae v wtsprake so verlost my.
171 Mijn lippen sullen loffsanck wtspreken, als ghy my sult gheleert hebben uwe rechtuerdichmakinghen.
172 Mijn tonghe sal v wtsprake voert segghen, want alle v gheboden sijn gherechticheyt.
173 Laet v hant wesen om my te helpen, want ick heb v gheboden vercoren.
174 Ick heb v salicheyt begheert Heere, ende v wet is mijn aendachte.
175 Mijn ziele sal leuen, ende v louen, ende v ordeelen sullen my helpen.
176 Ick heb ghedoelt als een scaep dat verloren ghegaen is, soect uwen dienaer want v gheboden en heb ick niet vergheten.

Vorige Volgende

Den .C.xviij. Psalm.

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

67

68

69

70

71

72

73

74

75

76

77

78

79