Den gheheelen Bybel, Inhoudende het oude ende nieuwe Testament (Leuvense bijbel 1548)

Den .C.xvij. Psalm.

Confitemini Domino.

1

BElijdt den Heere want hy is goet, want inder eewicheyt is sijn bermherticheyt.

2

Laet Israel nu segghen dat hy goet is, dat inder eewicheyt sijn bermherticheyt is.

3

Laet nu het huys van Aaron segghen, dat inder eewicheyt sijn bermherticheyt is.

4

Laetse nu alle segghen die den Heere vreesen, dat sijn bermherticheyt inder eewicheyt is.

5

Van die verdructheyt hebbe ick den Heere aenroepen, ende die Heere heeft my in die ruymte verhoort.

6

Die Heere is mijn helper ick en sal niet vreesen wat my een mensch doet.

7

Die Heere is mijn helper, ende ick sal mijn vianden versmaden.

8

Tes beter betrouwen te hebben opden Heere, dan te betrouwen in den mensch.

[p. *483]

9

Tes beter te hopen inden Heere, dan te hopen in die princen.

10

Alle die Heydenen hebben my omringhelt, ende tis inden naem des Heeren, dat ick my ouer hen ghewroken hebbe.

11

Omringhelende hebben sij my omringhelt, ende tis inden naem des Heeren, dat ick my ouer hen ghewroken hebbe.

12

Sij hebben my omringhelt ghelijck bien, ende sij sijn onsteken ghelijck een vier in die dornen, ende tis inden naem des Heeren, dat ick my ouer hen ghewroken hebbe.

13

Ick ben ghestooten ende omgheworpen dat ick vallen soude, ende die Heere heeft my ontfanghen.

14

Mijn stercheyt ende mijnen loff is die Heere, ende hy is my ter salicheyt gheworden.

15

Een stemme des verhueghens ende der salicheyt is in die tabernakelen der rechtuerdigher.

16

Die rechte hant des Heeren heeft cracht ghedaen, die rechte hant des Heeren heeft my verheuen, die rechte hant des Heeren heeft cracht ghedaen.

17

Ick en sal niet steruen maer leuen, ende ick sal vertellen die wercken des Heeren.

18

Castijende heeft my die Heere ghecastijt, ende hy en heeft my der doot niet gheleuert.

19

Doet my open die poorten der rechtuerdicheyt, als ick daer inghegaen ben, sal ick den Heere belijden,

20

dits die poorte des Heeren, die rechtuerdighe sullen daer in gaen.

21

Ick sal v belijden want ghy hebt my ghehoort, ende ghy sijt my gheworden ter salicheyt.

22

Den steen den welcken die timmerluyden verworpen hebben, desen is gheworden tot een hooftsteen des hoecs.

23

Vanden Heere is dit ghedaen ende tes wonderlijck in onsen ooghen.

24

Dit is den dach den welcken die Heere ghemaect heeft, laet ons verhueghen ende blijde sijn daer inne.

25

O Heere maect my salich, o Heere doet voerspoedelijck,

26

ghebenedijt is hy die coemt inden naem des Heeren.

Wy hebben v ghebenedijt vanden huyse des Heeren,

27

die Heere is Godt, ende hy heeft ons verlicht.

Stelt den Hooghen feestdach in die dicte der looueren tot aen den horn des outaers.

28

Ghy sijt mijn Godt, ende ick sal v belijden, mijn Godt sijdi ende ick sal v verheffen.

Ick sal v belijden, want ghy hebt my verhoort, ende sijt my gheworden ter salicheyt.

29

Belijdt den Heere, want hy is goet, want inder eewicheyt is sijn bermberticheyt.

Desen Psalm is ghedeelt in .xxij. ghelijcke deelen, die welcke int Hebreussch beghinnen elck van een besonder letter nae den Hebreusschen a b.