Den gheheelen Bybel, Inhoudende het oude ende nieuwe Testament (Leuvense bijbel 1548)

Den .C.xiiij. Psalm.

Dilexi quoniam exaudiet.

1

ICk heb bemint, want die Heere sal verhooren die stemme mijns ghebedts.

2

Want hy heeft sijn oore nae my gheneycht, ende in mijn daghen sal ick aenroepen.

3

Die pijnen der doot hebben my onuanghen, ende die perikelen der hellen hebben my gheuonden.

Verdructheyt ende pijne heb ick gheuonden,

4

ende den naem des Heeren heb ick aengheroepen.

O Heere verlost mijn ziele

5

bermhertich Heere, ende rechtuerdich, ende ons Godt die ontfermherticheyt doet.

6

Die Heere bewarende die cleyne, ick ben verootmoedicht gheweest ende hy heeft my verlost.

7

Keert weder om mijn ziele in v ruste, want die Heere heeft v wel ghedaen.

8

Want hy heeft mijn ziele verlost vander doot, mijn ooghen van tranen, mijn voeten vanden valle.

9

Ick sal den Heere behaghen int lantschap der leuender.