Den gheheelen Bybel, Inhoudende het oude ende nieuwe Testament (Leuvense bijbel 1548)

Den .C.xiij. Psalm.

In exitu Israel de AEgypto.

1

IN Israels wtganck van Egypten, des huys van Iacob wt dat volck der Barbaren.

2

Soe es Dioetsche volck gheworden sijn heylighinghe, Israel sijn machticheyt.

3

Die zee heuet ghesien ende is ghevloden, die Iordane is achterwaerts omme ghekeert.

4

Die berghen hebben op ghespronghen ghelijck rammen, ende die hueuelen ghelijck lammeren der scapen.

5

Wat is v zee dat ghy ghevloden sijt, ende ghy Iordane dat ghy achterwaerts omghekeert sijt.

6

Ghy berghen dat ghy op ghespronghen hebt ghelijck rammen, ende ghy hueuelen als lammeren der scapen?

7

Van daensicht des Heeren is die aerde beruert, van daensicht des Godts van Iacob.

8

Die den steen verkeert heeft in staende wateren, ende die steenroetse tot fonteynen der wateren.

9

Niet ons Heere niet ons, maer uwen naem gheeft die glorie.

10

Van uwer bermherticheyt ende waerheyt, dat tot eenighen tijden die Heydenen niet en segghen, waer is hen Godt?

11

Maer ons Godt is inden hemel, alle dat hy ghewilt heeft, dat heeft hy ghedaen.

12

Die afgods beelden der Heydenen sijn siluer ende gout, wercken van der menschen handen.

13

Sij hebben eenen mont ende sij en sullen niet spreken, sij hebben ooghen ende sij en sullen niet sien.

14

Sij hebben ooren, ende sij en sullen niet hooren, sij hebben nuesen, ende sij en sullen niet rieken.

15

Sij hebben handen, ende sij en sullen niet tasten, sij hebben voeten, ende sij en sullen niet wandelen, sij en sullen niet roepen met haren kelen.

16

Hen lieden ghelijck moeten sij worden diese maken, ende alle die in hen betrouwen.

17

Dat huys van Israel heeft inden Heere ghehoept hy is hen helper ende hen bescermer.

18

Dat huys van Aaron heeft inden Heere ghehoept, hy is hen helper ende hen bescermer.

19

Die den Heere vreesen hebben inden Heere ghehoept, hy is hen helper ende hen bescermer.

20

Die Heere heeft onser ghedachtich gheweest, ende heeft ons ghebenedijt.

Hy heeft ghebenedijt het huys van Israel, hy heeft ghebenedijt het huys van Aaron.

21

Hy heeft ghebenedijt alle die ghene die den Heere vreesen, den cleynen met den grooten.

22

Die Heere doe noch meer op v lieden, op v ende op v lieder kinderen.

23

Ghebenedijt sijdi vanden Heere, die ghemaect heeft hemel ende eerde.

24

Den hemel der hemelen behoort den Heere toe, maer die aerde heeft hy ghegheuen den kinderen der menschen.

25

Die doode en sullen v niet louen Heere, noch alle die nederdalen in die helle.

26

Maer wy die leuen ghebenedijden den Heere, van nu aen tot inder eewicheyt.