Den gheheelen Bybel, Inhoudende het oude ende nieuwe Testament (Leuvense bijbel 1548)

Den .C.x. Psalm.

Confitebor tibi Domine.

1

ICk sal v belijden Heere in mijn gheheel herte, in den raet ende vergaderinghe der rechtuerdigher.

2

Groot sijn die wercken des Heeren, wtghesocht tot alle sijn begheerten.

3

Belijdinghe ende heerlijcheyt is sijn werck, ende sijn rechtuerdicheit blijft in die eewicheyt der eewicheden

4

Een ghedenckenisse sijnder wonderwercken heeft hy ghemaect die bermhertighe ende ghenadighe Heere,

5

spijse heeft hy ghegheuen den ghenen die hem vreesen.

Hy sal ghedachtich wesen inder eewicheyt sijns testaments

6

die macht sijnder wercken sal hy vercondighen sijnen volcke.

7

Om dat hy hen gheuen soude die erffenisse der Heydenen, die wercken sijnder handen sijn warachtich ende recht ordeel.

8

Ghetrou sijn alle sijn gheboden vast ghemaect in die eewicheyt der eewicheden, ghemaect in die waerheyt ende gherechticheyt.

9

Verlossinghe heeft hy sijnen volcke ghesonden, hy heeft inder eewicheyt sijn testament beuolen.

Heylich ende veruaerlijck is sijnen naem,

10

tbeghinsel der wijsheyt is die vreese Godts.

Tverstandt is goet alle den ghenen die daer nae doen, sijnen loff blijft inder eewe der eewen.