Den gheheelen Bybel, Inhoudende het oude ende nieuwe Testament (Leuvense bijbel 1548)



Den .C.ix. Psalm. Dixit Dominus Domino.
1 DIe Heere heeft gheseyt tot mijnen Heere, sidt aen mijn rechte handt. Tot dat ick v vianden stelle, tot een scabelle uwer voeten.
2 Die roede van uwer cracht sal die Heere wtsenden wt Sion, hebt heerscappie int midden van uwen vianden.
3 Met v is tbeghinsel inden dach van uwer cracht, in dat blinckende schijnsel der heyleghen, wten buyck heb ick v voertghebracht voer die morghensterre.
4 Die Heere heuet ghesworen, ende ten sal hem niet berouwen, ghy sijt een priester inder eewicheyt nae die ordinancie van Melchisedech.
5 Die Heere aen v rechte sijde, heeft die coninghen al heel ghebroken inden dach sijnder gramscappen.
6 Die Heere sal ordeelen onder die natien, ende veruullen die veruallinghen, hy sal die hoofden tsamen stooten int lant van veel luyden.
7 Vander beken sal hy inden wech drincken, daer om sal hy thooft verheffen.