Den gheheelen Bybel, Inhoudende het oude ende nieuwe Testament (Leuvense bijbel 1548)

Den .xcvij. Psalm.

Cantate Domino canticum.

1

SInghet den Heere een nieuwe liet, want hy heeft wonderlijcheden ghedaen.

Sijn rechte hant heeft hem salicheyt ghewracht, enden sijnen heylighen arm.

2

Die Heere heeft sijn salicheyt bekent ghemaect, int aenschijn der Heydenen heeft hy gheopenbaert sijn rechtuerdicheyt.

3

Hy is ghedachtich worden sijnder bermherticheyt, ende sijnder waerheyt den huyse van Israel.

Alle die eynden des aertrijcs hebben ghesien die salicheyt ons Godts.

4

Maect iolijt den Heere gheheel aertrijck, singt ende verhuecht v ende singt lofsanck.

5

Singt lof den Heere op die herpe, met die herpe ende metter stemmen des lofsancks,

6

met wtgheslaghen trompetten ende metter stemmen van een hoernen trompet.

Maect iolijt in daenschijn van des conincs des Heeren,

7

laet die zee beroert worden ende haer volheyt, den omganck der eerden ende die daer in woonen.

8

Die vloeden sullen metten handen tsamen slaende vruecht maken, die berghen sullen hen tsamen verhueghen,

9

van daenschijn des Heeren, want hy coemt dat aertrijc ordeelen.

[p. *476]

Hy sal den omganck der eerden ordeelen in rechtuerdicheden, ende die volcken in ghelijcheyt.