Den gheheelen Bybel, Inhoudende het oude ende nieuwe Testament (Leuvense bijbel 1548)

Den .xcvi. Psalm.

Dominus regnauit exultet.

1

DIe Heere heeft gheregneert, laet haer die eerde verhueghen, ende laet veel eylanden hen verblijden.

2

Wolcken ende donckerheyt sijn rontsom hen, rechtuerdicheyt ende ordeel sijn die vasticheyt van sijnen stoel.

3

Een vier sal voor hem gaen, ende ontsteken rontsomme sijn vianden.

4

Sijn blixemen hebben ghelicht opden omganc der eerden, die eerde heuet ghesien ende is beroert gheweest.

5

Die berghen sijn versmolten ghelijck was voor daenschijn des Heeren, van daensicht des Heeren des gheheelen aertrijcs.

6

Die hemelen hebben sijn rechtuerdicheyt vercondicht, ende alle die volcken hebben ghesien sijn glorie.

7

Laetse bescaempt worden alle die ghesneden afgodts beelden aenbidden, ende die glorieeren in hen afgoden.

Aenbidt hem alle sijn enghelen,

8

Sion heuet ghehoort, ende heeft blijde gheweest.

Ende die dochteren van Iuda hebben hen verhuecht, om uwe ordeelen Heere.

9

Want ghy alderhoochste Heere sijt bouen alle deertrijc, wtermaten seere sijdi verhauen bouen alle die goden.

10

Die den Heer bemint haettet quaet, die Heere bewaert die zielen van sijnen heylighen, van des sondaers hant sal hijse verlossen.

11

Een licht is den rechtuerdighen opghegaen, ende den oprechten van herten blijscap.

12

Verblijdt v ghy rechtuerdighe inden Heere, ende belijdt in die gedenckenisse van sijnder heylichmakinghen.