Den gheheelen Bybel, Inhoudende het oude ende nieuwe Testament (Leuvense bijbel 1548)

Den .xc. Psalm.

Qui habitat.

1

DIe daer woont in die helpe des alderhoochsten, die sal woonen int bescermen van God des hemels.

2

Hy sal den Heere segghen ghy sijt mijn ontfanger, ende mijn toevlucht mijn Godt in hem sal ick hopen.

3

Want hy heeft my verlost vanden strick des iagers, ende van dat scerp woort.

4

Met sijnen scouderen sal hy v bescaduwen, ende onder sijn vloghelen suldi hopen.

5

Met eenen scilt sal v sijn waerheyt omuanghen, ghy en sult niet vreesen van die nacht vreese.

6

Vanden pijl vlieghende inden dach, van die becommeringhe doorwandelende in duysternissen, vanden aenloop ende vanden middaechschen duyuel.

7

Daer salder van uwer sijden duysent vallen, ende thien duysent van uwer rechter sijden, maer tot aen v en salt niet ghenaken.

8

Maer nochtans suldijt met uwen ooghen aenmercken, ende den loon der sondaren suldi sien.

9

Want ghi Heere sijt mijn hope, int alderhoochste hebdi v toevlucht ghestelt.

10

Tot aen v en sal gheen quaet comen, ende gheen gheessele en sal uwen tabernakel ghenaken.

11

Want sijnen enghelen heeft hy van v beuolen, dat si v bewaren souden in allen uwe weghen.

12

In hen handen sullen sij v draghen, dat ghi by auontueren uwen voet aenden steen niet en stoot.

13

Op die adere ende den basiliscus suldi wandelen, ende ghy sult vertreden den leeuwe ende den draeck.

14

Om dat hy in my ghehoept heeft sal ick hem verlossen, ick sal hem bescermen om dat hy mijnen naem ghekent heeft.

15

Hy heeft tot my gheroepen, ende ick sal hem verhooren, met hem ben ick in die tribulacie, ick sal hem verlossen ende glorificeren.

16

Met lancheyt der daghen sal ick hem veruullen, ende hem vertoonen mijn salicheyt.