Den gheheelen Bybel, Inhoudende het oude ende nieuwe Testament (Leuvense bijbel 1548)
(2008)–Anoniem Leuvens bijbel 1548–
Auteursrechtelijk beschermd1[2]HEere Godt mijnder salicheyt, inden dach heb ick gheroepen, ende des nachts voor v. | |
2[3]Laet voor v aenschijn ingaen mijn ghebedt neycht v oore tot mijnder bedinghen. | |
3[4]Want mijn ziele is met quade veruult, ende mijn leuen is nae by der hellen ghenaect. | |
4[5]Ick ben gheacht gheweest metten ghenen die inden cuyl nederdalen, ick ben gheworden als een mensch sonder helpe, | |
5[6]onder die dooden vrij. Ghelijck die ghewonde slapende in die grauen, der welcker ghy niet meer ghedachtich en sijt, ende si sijn van uwer hant verstooten. | |
6[7]Sij hebben mi ghestelt inden ondersten cuyl, in die duyster plaetsen, ende in die scaduwe der doot. | |
7[8]Op my is v verbolghentheyt gheuesticht, ende allen v vloeden hebdi ouer my gheleydt. | |
8[9]Verre hebdi mijn bekende van my ghemaect, si hebben my ghestelt hen tot een afgrijselijcheyt. Ick ben gheleuert, ende ick en ghinck niet wt, | |
9[10]mijn ooghen worden cranck van ghebreckelijcheyt. Ick heb tot v gheroepen Heere alle den dach, ick heb mijn handen tot v wtghestrect. | |
10[11]Suldi den dooden wonderlijcke dinghen doen? oft sullense die medecijn meesters verwecken vander doot ende sullen sij v belijden? | |
11[12]Sal oock iemant int graf v bermherticheyt vertellen, ende v waerheyt in die verderffenisse? | |
12[13]Sullen in die duysternissen v wonderlijcheden bekent worden, ende v rechtuerdicheden in dlant der verghetenheyt? | |
13[14]Ende ick heb tot v Heere gheroepen, ende vroech sal mijn ghebedt v voorcomen. | |
14[15]Heere waerom verstoot ghy mijn ghebedt, waerom keert ghy v aensicht van my? | |
15[16]Arm ben ick ende in arbeyden van mijnder ioncheyt af, maer verhauen ben ick vernedert gheweest ende verbaest. | |
16[17]Ouer my sijn v gramscappen door ghegaen, ende v veruaerlijcheden hebben my verbaest ghemaect. | |
17[18]Sij hebben my omuanghen ghelijc water, den gheheelen dach hebben sij my omringhet tsamen. | |
18[19]Ghy hebt verre van my ghedaen mijnen vrint ende naesten, ende mijn bekende vander allendicheyt. |
|