Den gheheelen Bybel, Inhoudende het oude ende nieuwe Testament (Leuvense bijbel 1548)

Den .lxxi. Psalm.

Deus iudicum.

1[2]

GOdt gheeft v ordeel den coninck, ende uwe rechtuerdicheyt des conincs sone.

Om te ordeelen v volck in rechtuerdicheden, ende v arme in dat rechte vonnisse.

2[3]

Laet die berghen vrede ontfanghen den volcke ende die hueuelen die rechtuerdicheyt.

3[4]

Hy sal ordeelen die arme des volcs ende verlossen die kinderen der armen, ende vernederen den valschen beclapper.

4[5]

Ende hy sal blijuen metter sonnen ende voer die mane, van gheslachte tot gheslachte.

5[6]

Hy sal nederdalen als den reghen in dat vlies, ende ghelijck die druppelen druyppende op die aerde.

6[7]

In zijnen daghen sal opgaen die rechtuerdicheyt, ende die ouervloedicheyt des vredes, tot dat die mane sal wechghenomen worden.

7[8]

Ende hy sal heerscappie hebben vander zee totter zee, ende vanden vloet tot aen die eynden van den omganck des aertrijcs.

8[9]

Voer hem sullen nederuallen die morianen, ende sijn vianden sullen die aerde lecken.

9[10]

Die coninghen van Tharsis ende die eylanden sullen ghiften offeren, die coninghen van Arabien ende Saba sullen gauen aenbrenghen.

10[11]

Ende hem sullen aenbidden alle die coninghen, alle die Heydenen sullen hem dienen.

11[12]

Want hy sal verlossen den armen vanden machtighen, ende den armen den welcken gheen helper en was.

12[13]

Hy sal sparen den armen ende behoeuighen, ende die zielen der armen sal hy behouden.

13[14]

Van die woeckerien ende onrechtuerdicheden sal hy hen zielen verlossen, ende eerlijck sal haren naem sijn voer hem.

14[15]

Ende hy sal leuen, ende hem sal ghegheuen worden van tgout van Arabien, ende sij sullen daer mede aenbidden altijt, alle den dach sullen sij hem ghebenedijden.

15[16]

Ende daer sal een vasticheyt wesen op die aerde, op doppersten vanden berghen, zijn vrucht sal verhauen worden bouen Libanus berch, ende sij sullen bloeyen vander stadt ghelijck dat gras der aerden.

16[17]

Sijnen naem sij ghebenedijt inder eewicheyt, voer die sonne blijft sijnen naem.

Ende in hem sullen ghebenedijt worden alle die gheslachten der werelt, alle die Heydenen sullen hem groot maken.

17[18]

Ghebenedijt sij die Heere die Godt van Israel die wonderlijcke dinghen doet alleene.

18[19]

Ende ghebenedijt sij den naem van sijnder maiesteyt inder eewicheyt, ende van zijnder maiesteyt sal veruult worden alle die aerde, dat ghesciede, dat ghesciede.