Den gheheelen Bybel, Inhoudende het oude ende nieuwe Testament (Leuvense bijbel 1548)

Den .lxx. Psalm.

In te Domine speraui.

1

IN v Heere heb ick ghehoept, ick en sal niet bescaemt worden inder eewicheyt,

2

in uwe rechtuerdicheyt verlost my ende trect my wt.

Neycht tot my v oore, ende maect my salich.

3

Weest my tot eenen bescermende Godt, ende tot een wel beheymde plaetse dat ghy moecht behouden.

Want mijn vasticheyt ende mijn toe vlucht zijt ghy.

4

Mijn Godt verlost my wt die handt des sondaers, ende van die handt des gheens die teghen die wet doet, ende des boosen.

5

Want ghy sijt mijn lijdtsaemheyt Heere, Heere mijn hope van mijnder ioncheyt aen.

6

In v ben ick versterct vanden buyck, van mijns moeders buyck sijt ghy mijn bescermer.

In v is mijnen sanck altijts,

7

als een wonderlijck teeken ben icker vele gheworden, ende ghy sijt een sterck helper.

8

Veruult moet mijn mont worden met loue, dat ick mach singhen v glorie, den gheheelen dach v grootheyt.

9

En verworpt my niet in den tijt des ouderdoms, als mijn cracht sal vergaen sijn soo en verlaet my niet.

10

Want mijn vianden hebben my gheseyt, ende die mijn ziele wachten hebben eenen raet ghemaect ouer een.

11

Segghende Godt heeft hem verlaten, veruolcht ende grijpt hem want daer en es niemant die hem verlosse.

[p. *466]

12

Godt en maect v niet verre van my, mijn Godt siet toe tot mijnder helpen.

13

Laetse bescaemt worden ende vergaen die mijn ziele lasteren, laetse met versmaetheyt ende bescaemtheyt ouerdect worden, die my quaet soecken.

14

Maer ick sal altijts hopen, ende noch meer toe doen tot allen uwen loff.

15

Mijnen mont sal vercondighen uwe rechtuerdicheyt, alle den dach v salicheyt.

Om dat ick tghetal niet gheweten en hebbe,

16

soo sal ic gaen in des Heeren machticheyt, Heere ick sal ghedencken alleen uwer rechtuerdicheyt.

17

Godt ghy hebt my gheleert van mijnder ioncheyt, ende tot nu toe sal ick wt spreken v wonderen.

18

Ende tot die ouderdom ende grijsdom, Godt en verlaet my niet.

Tot dat ick vercondighe uwen arm, allen tgheslachte dat comen sal.

V machticheyt

19

ende v rechtuerdicheyt Godt, tot in die hoochste groote wercken die ghi ghedaen hebt, Godt wie is ws ghelijck?

20

Hoe groote tribulacien hebdi my ghetoont, veele ende quade, ende wederom ghekeert sijnde, hebdi my leuende ghemaect, ende van die affgronden der aerden hebdi my anderwerff weder ghebracht.

21

Ghy hebt vermenichfuldicht v grootdadicheyt, ende weder om ghekeert sijnde hebdi my ghetroost.

22

Want ick sal v oock belijden op die instrumenten des Psalters sanck uwe waerachticheyt Godt, ick sal v singhen op die herpe ghy heylich van Israel.

23

Verhueghen sullen mijn lippen, als ick v singhen sal, ende mijn ziele die ghy verlost hebt.

24

Maer oock mijn tonghe sal den gheheelen dach v rechtuerdicheyt ouerdencken, als sij bescaempt ende veruaert sullen sijn die mij quaet suecken.