Den gheheelen Bybel, Inhoudende het oude ende nieuwe Testament (Leuvense bijbel 1548)
(2008)–Anoniem Leuvens bijbel 1548–
Auteursrechtelijk beschermd1[2]GOdt verhoort mijn ghebedt, ende en versmaet mijn ootmoedich bidden niet, | |
2[3]merct op mij, ende verhoort my. Ick ben bedroeft gheweest in mijn oeffeninghe, ende ick ben heel onstelt | |
3[4]van die stemme des viants, ende van die quellinghe des sondaers. Want sij hebben teghen my ghekeert boosheden, ende in gramscappen hebben sij my quellijck gheweest. | |
4[5]Mijn herte is in my heel onstelt gheweest, ende den anxt der doot is op mij gheuallen. | |
5[6]Vreese ende beuinghe sijn op my ghecomen, ende die duysternissen hebben my ouerdect. | |
6[7]Ende ick heb gheseyt wie sal my vederen gheuen als van eender duyuen, ende dat ick sal vlieghen, ende rusten? | |
7[8]Siet ick heb my verre ghemaect al vliedende, ende ick bleef woonende in die woestijne. | |
8[9]Ick verbeydde hem die my behouden heeft van die cleynmoedicheyt des gheests, ende vanden tempeest. | |
9[10]Worpse neder Heere ende deylt hen tonghen, want ick hebbe boosheyt ende wedersprake ghesien in die stadt. | |
10[11]Die boosheyt sal dach ende nacht haer omuanghen op haer mueren, ende arbeyt is int midden van haer | |
11[12]ende onrechtuerdicheyt. Ende van haerder straten en heeft niet ghebroken, woecker ende bedroch. | |
12[13]Want hadde mijn viant my vermalendijt, dat soude ick emmer verdraghen hebben. Ende hadde die ghene die my haette groote dinghen ouer my ghesproken, ick soude my bij auontueren verborghen hebben van hem. | |
13[14]Maer ghy eendrachtich mensch, mijn leytsman, ende mijn bekende. | |
14[15]Die te samen met my soete spijsen nuttede, int huys Godts hebben wy ghewandelt met eendrachticheyt. | |
15[16]Laet die doot op hen comen, ende laetse in die helle nederdalen al leuende. Want boosheden sijn in hen wooninghen, int midden van hen. | |
16[17]Maer ick heb tot Godt gheroepen, ende die Heere sal my behouden. | |
17[18]Tsauonts ende smorghens ende des middaechs sal ict vertellen ende vercondighen, ende hy sal mijn stemme verhooren. | |
18[19]Hy sal mijn ziele in vrede verlossen vanden ghenen die my aencomen, want onder vele waren sij met my. | |
19[20]Godt salt verhooren ende hy salse vernederen, die voer der werelt tijden is. Want sij en hebben gheen veranderinghe, ende sij en hebben Godt niet ghevreest, | |
20[21]hy heeft sijn hant wt ghereyct ter vergheldinghen. Sij hebben sijn verbont besmet, | |
21[22]sij sijn ghedeelt van die gramscap sijns aensichts, ende sijn herte is ghenaket. Sijn redenen sijn sachter gheworden dan olie, ende sij sijn scichten. | |
22[23]Worpt opden Heere uwe sorghe, ende hy sal v op voeden, hy en sal inder eewicheyt den rechtuerdighen gheen wanckelbaerheyt gheuen. | |
23[24]Maer ghi Godt, sultse leyden in den put des doots. Die bloetstortighe mannen, ende die bedrieghers en sullen hen daghen ter helicht niet brenghen, maer ick sal in v hopen Heere. |
|