Den gheheelen Bybel, Inhoudende het oude ende nieuwe Testament (Leuvense bijbel 1548)
(2008)–Anoniem Leuvens bijbel 1548–
Auteursrechtelijk beschermd1[3]ONtfermt v mijnder Godt, na v groote bermherticheyt. Ende nae die menichte van uwen bermherticheden, soe wischet aff mijn boosheyt. | |
2[4]Wascht my noch meer van mijn ongherechticheyt, ende van mijn sonde suyuert my. | |
3[5]Want mijn boosheyt bekenne ick, ende mijn sonde is altijt teghen ouer my. | |
4[6]V alleen heb ick ghesondicht, ende quaet voer v ghedaen, op dat ghy soudt gherechtuerdicht worden in v woerden, ende verwinnen als ghy gheordeelt wort. | |
5[7]Want siet ick ben in boosheden ontfanghen, ende in sonden heeft my mijn moeder ontfanghen. | |
6[8]Want siet ghy hebt die waerheyt bemint, die onsekere ende verborghen dinghen uwer wijsheyt hebdi my gheopenbaert. | |
7[9]Ghy sult my bespraeyen met hyssopen ende ick sal ghesuyuert worden, ghy sult my wasschen ende bouen sneu sal ick wit worden. | |
8[10]Mijnen ghehoor suldi blijscap ende vruecht gheuen, ende die verootmoedichde beenderen sullen hen verhueghen. | |
9[11]Keert v aensicht van mijnen sonden, ende alle mijn boosheden wilt wt wisschen. | |
10[12]Een suyuer herte scept in my o Godt, ende den rechte gheest verniewt in mijnen binnensten. | |
11[13]En verworpt my niet van uwen aensicht, ende uwen heyleghen gheest en neemt van my niet. | |
12[14]Gheeft my wederom die blijscap van uwen salichmakere, ende metten principalen gheest versterct my. | |
13[15]Ick sal den boosen v weghen leeren, ende die boose sullen tot v bekeert worden. | |
14[16]Verlost my vanden bloeden Godt, Godt mijnder salicheyt, ende mijn tonghe sal hoochlijck louen uwe rechtuerdicheyt. | |
15[17]Heere ghy sult mijn lippen open doen, ende mijnen mont sal uwen loff vercondighen. | |
16[18]Want haddi ghewilt ick soude emmer sacrificie ghegheuen hebben, maer ghy en sult in die brantofferanden gheen ghenoechte hebben. | |
17[19]Een sacrificie es Gode eenen heelen bedructen gheest, een heel ghebroken ende verootmoedicht herte en suldi Godt niet versmaden. | |
18[20]Heere doet goedertierlijck Sion in uwen goeden wille, ende laet ghetimmert worden die mueren van Ierusalem. | |
19[21]Dan suldi ontfanghen het sacrificie der rechtuerdicheyt, offeranden ende brantofferen, dan sullen sij op uwen outaer calueren legghen. |
|