Den gheheelen Bybel, Inhoudende het oude ende nieuwe Testament (Leuvense bijbel 1548)

Den .xlix. Psalm.

Deus Deorum.

1

GOdt die Heere der Goden heeft ghesproken, ende hy heeft die eerde gheroepen.

Vanden opganck der sonnen totten onderganck toe,

2

soe scijnt wt Sion die ghedaente van sijnder schoonheyt.

[p. *459]

3

Godt sal openbaerlijck comen, ons Godt ende hy en sal niet swijghen.

Een vier sal in sijn aenscouwen berrende worden, ende rontsomme een groot tempeest.

4

Hy heeft den hemel van bouen gheroepen, ende die eerde om te ondersceyden sijn volck.

5

Vergadert hem sijn heyleghen, die sijn testament ordineren op die sacrificien.

6

Ende die hemelen sullen sijn rechtuerdicheyt vercondighen, want Godt is die richter.

7

Hoort mijn volck ende ick sal spreken Israel ende ick sal v betuyghen, ick ben Godt v Godt.

8

Ick en sal in v sacrificien niet straffen, want v brantofferen sijn altijt in mijn aensicht.

9

Ick en sal van uwen huyse gheen calueren nemen, noch bocken van uwen cudden.

10

Want mijne sijn alle die wilde beesten der bosschen, dat vee op die berghen ende die rinderen.

11

Ick heb ghekent alle dat tgheuoghelte des hemels, ende die schoonheyt des ackers is met my.

12

Eest dat ick hongher hebbe, soo en sal ict v niet segghen, want mijne is den omganck der eerden ende haer volheyt.

13

Sal ick eten tvleesch vanden stieren? oft sal ick dbloet vanden bocken drincken?

14

Offert den Heere dat sacrificie des loefs, ende betaelt den alderhoochsten v beloften.

15

Ende aenroept my in den dach des lijdens, ende ick sal v verlossen ende ghy sult my eere bewijsen.

16

Maer den sondaer heeft Godt gheseyt, waer om verteldi mijn rechtuerdicheden, ende neemt mijn testament in uwen mont?

17

Maer ghy hebt die onderwijsinghe ghehaet, ende mijn woerden achter v gheworpen.

18

Saechdi eenen dief ghy liept met hem, ende metten ouerspeelders steldet ghy v deel.

19

Uwen mont ouervloedde van quaetheyt, ende v tonghe bracht te samen bedrieghelijcheden.

20

Sittende spraecte ghy teghen uwen broeder, ende teghen ws moeders sone stelde ghy een struycsel,

21

dit hebdi ghedaen, ende ick heb ghesweghen.

Ghy hebt booslijck ghemeynt dat ick ws ghelijck soude wesen, ick sal v straffen, ende voer v ooghen stellen.

22

Verstaet dit ghy die Godt vergheet, op dat hy niet eens wech en neme, ende datter niemant en sij die verlossen mach.

23

Dat sacrificie des loefs sal my eeren, ende daer is den wech doer den welcken ick hem toonen sal die salicheyt Godts.