Den gheheelen Bybel, Inhoudende het oude ende nieuwe Testament (Leuvense bijbel 1548)



Den .xxvij. Psalm. Ad te Domine clamabo.
1 TOt v Heere sal ick roepen, mijn Godt en swijcht van my niet, op dat ick tot eenighen tijt, als ghy van my swijcht, niet ghelijc en worde den ghenen die nederdalen inden put.
2 Verhoort Heere die stemme mijnder smeekender beden als ick tot v bidde, als ick mijn handen opheffe op uwen heylighen tempel.
3 Dat ghy my niet tesamen en leuert metten sondaren, ende metten ghenen die boosheyt wercken en verdoet my niet. Die vrede met haren naesten spreken, maer quaetheden sijn in hen herten.
4 Gheeft dien nae hen wercken, ende nae die archeyt van haren vonden. Nae die wercken van haren handen gheeft hen, ende vergheldet hen wederom haren loon.
5 Want sij en hebben die wercken des Heeren niet verstaen, ende in die wercken van haren handen suldise verderuen ende niet optimmeren.
6 Ghebenedijt si die Heere, want hy heeft verhoort die stemme van mijnder smeekender beden.
7 Die Heere is mijn helper ende mijn bescermer, ende in hem heeft mijn herte ghehoept, ende ick ben gheholpen. Ende mijn vleesch is wederom ghebloeyt, ende wt mijnen wille sal ick hem belijden.
8 Die Heere is die stercheyt sijns volcs, ende hy is een bescermer der behoudenissen van sijnen ghesalfden.
9 Heere behoudt v volck, ende ghebenedijt uwen erfdeel, ende regeertse ende verheftse tot inder eewicheyt.