Den gheheelen Bybel, Inhoudende het oude ende nieuwe Testament (Leuvense bijbel 1548)

Den .xx. Psalm.

Domine in virtute.

1[2]

Heere in uwer cracht sal hem die coninck verblijden, ende op uwe salicheyt sal hi hem seer verhueghen.

2[3]

Den wensch sijnder herten hebdy hem ghegheuen, ende van den wille sijnder lippen en hebdi hem niet berooft.

3[4]

Want ghy hebt hem voorcomen met die ghebenedijdinghe uwer soeticheyt, ghi hebt op sijn hooft ghestelt van een croone van costelijcke ghesteente.

4[5]

Dleuen heeft hy van v begheert, ende ghy hebbet hem ghegheuen, lancheyt der daghen eewelijck ende emmermeer.

5[6]

Groot is sijn glorie in uwe salicheyt, glorie ende groo-

[p. *449]

te schoonheyt suldi op hem stellen.

6[7]

Want ghy sult hem gheuen ter ghebenedijdinghen, eewelijck ende emmermeer, ghy sult hem verblijden in vruechden met uwen aensicht.

7[8]

Want die coninck inden Heere hoept, ende in die bermherticheyt des alderhoochsten en sal hy niet verroert worden.

8[9]

Laet v hant gheuonden worden allen uwen vianden v rechter hant moet vinden alle die v haten.

9[10]

Ghy sultse stellen als eenen ouen des viers ten tijde van uwen aensichte, die Heere salse in sijn gramscap verstooren, ende tvier salse verslinden.

10[11]

Hen vrucht suldi vander eerden vernielen, ende hen saet van die kinderen der menschen.

11[12]

Want sij hebben quade dinghen op v ghekeert, sij hebben raden ghedacht die sij niet en hebben connen vast ghemaken.

12[13]

Want ghy sult hen ten rugghe stellen, in v bleuelinghen suldi hen aensicht bereyden.

13[14]

Wort verheuen Heere in v cracht, wij sullen singhen ende metten psalter v crachten louen.