Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxvij. Capittel.

1

⁺ENde hier toe nam Iob noch meer, opnemende sijn ghelijckenisse ende heeft gheseyt.

+ A

2

Soe warachtelijck als Godt leeft (die mijn ordeel wech ghenomen heeft ende die almachtighe die mijn ziele ghebracht heeft tot bitterheyt)

3

Want soe langhe alser adem in my is, ende den gheest Godts in mijn noesgaten.

4

Soe en sullen mijn lippen niet gheen boosheyt spreken, noch mijn tonghe en sal gheen loghene versieren.

5

Verre sij van my, dat ick v soude voer rechtueerdich ordeelen, tot dat ick vergae, en sal ick van mijnder onnooselheyt niet wijcken.

6

Mijn gherechticheyt die ick heb begonst te houden, en sal ick niet verlaten. ⁺Want mijn herte en wroecht my niet in alle mijn leuen.

+ B

7

Als die ongoddelijcke sij mijn viant, ende mijn wederpartyder als die boose.

8

Want welck is die hope vanden Hypocrijten eest dat hy ghierichlijck rooft, ende dat Godt sijn ziele niet en verlost?

9

Sal Godt sijn roepen hooren, als die benautheyt hem ouercomen sal?

10

Oft sal hy in den almachtighen moghen ghenoechte hebben, ende Godt aenroepen tot allen tijden?

11

Ick sal v leeren doer die hant Godts, wat die almachtighe heeft, ende ick en sals niet verborghen.

12

Siet ghi weetet allegader, ende waer om spreect ghy sonder sake ydel dinghen?

13

⁺Dit is het deel vanden ongoddelijcken mensch by Gode ende die erffelijcheit der gheweldigher, die sij van den almachtighen ontfanghen sullen.

+ C

14

Eest dat sijn kinderen veel worden, soo sullen sij des sweerts sijn, ende sijnder kinder kinderen en sullen niet versaet worden van broode.

15

Die van hem sullen ouerghebleuen sijn, sullen begrauen worden in die doot ende sijn weduwen en sullen niet weenen.

16

Alwaert dat hy tsiluer tsamen ouer een vergadert ghelijck aerde, ende dat hy cleederen bereyde ghelijck slijck.

17

Hy sal die warachtelijck bereyden, maer die rechtuerdighe sal daer mede ghecleedt worden, ende tsiluer sal die onnoosel deylen.

18

⁺Hy heeft als een motte sijn huys ghetimmert, ende ghelijck een wachter heeft hy een lommer hutte ghemaect.

+ D

19

Als die rijcke sal ontslapen, soe en sal hy niet met hem wechdraghen. Hy sal sijn ooghen open doen, ende niet vinden.

20

Die armoede sal hem omuanghen ghelijck water, des nachts sal hem den tempeest verdrucken.

21

Den berrenden wint sal hem opnemen, ende wech voeren, ende ghelijck eenen stormenden wint sal hi hem wech nemen van sijnder plaetsen.

22

Ende hy sal die op hem senden, ende niet sparen, van sijnder hant sal hy vliedende vlieden.

23

Hy sal op hem sijn handen tsamen drucken, ende op hem blasen, aensiende sijn plaetse.