Den gheheelen Bybel, Inhoudende het oude ende nieuwe Testament (Leuvense bijbel 1548)



Dat .xxvi. Capittel.
1 Ga naar margenoot+ENde Iob antwoerdende heeft gheseyt,
2 Wiens helper sijdi? des gheens die onmachtich is? ende onderhoude ghy den arm van den ghenen die niet sterck en is?
3 Wien hebdi raet ghegheuen? bijauontueren den ghenen die gheen wijsheyt en heeft, ghi hebt v groote voersienicheyt ghetoont.
4 Wien hebdi willen leeren? en is dat niet die ghene die den adem ghemaect heeft?
5 Siet die ruesen suchten onder dwater, ende die met hen woonen.
6 Naect is die helle voer hem, ende die verderffenisse en heeft ghen decsele.
7 Die dat noorde wtspant opt ydele, ende hangt die eerde op niet.
8 Die de wateren bindt in sijn wolken, dat sij te samen niet en souden wtbersten nederwaerts.
9 Die daensicht van sijnen rechter stoel houdt, ende spraeyt sijnen neuel daer ouer.
10 Een pale heeft hy rontsomme die wateren ghestelt tot dat
[pagina *435]
gheeynt worden dlicht, ende die duysternissen.
11 Die columnen des hemels beuen, ende sijn veruaert tot sijnen wille.
12 In sijn stercheyt sijn haestelijck die zeen vergadert, ende sijn voersienicheyt heeft den houerdighen gheslaghen.
13 Sijnen gheest heeft die hemelen verciert, ende met die helpe van sijnder hant es wt ghebracht dat cromme serpent.
14 Siet dits gheseyt van een deelsijnder weghen, ende als wy nauwelijcs een cleyn druppele van sijnen woerden ghehoort en hebben, wie sal den dondere van sijnder grootheyt moghen aensien?	margenoot+ A