Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xx. Capittel.

1

⁺ENde Sophar die Naamathiter antwoerdende heeft gheseyt.

+ A

2

Daerom soo volghen mijn versceyden ghedachten deen nae dander, ende mijnen sin wort ghetrocken tot versceyde dinghen.

3

Die leeringhe waer mede ghy my straft, sal ick hooren, ende den gheest mijns verstants sal my antwoerden.

4

Dit weet ick van tbeghinsel, van dat die mensch ghestelt is op die eerde.

5

Dat den loff der ongoddelijcker cort is, ende die blijscap vanden gheveynsden als een punct.

6

Al eest dat sijn houerdie opclimt totten hemel, ende dat sijn hooft die wolcken gheraect,

7

Soe sal hy als eenen mesthoop ten eynde verdoruen worden, ende die hem ghesien hadden, ⁺sullen segghen, Waer is hy?

+ B

8

Ghelijck eenen wech vlieghenden droom en sal hy niet geuonden worden, hy sal voerby gaen als een visioen des nachts.

9

Die ooghe die hem ghesien hadde, en sal hem niet sien, ende sijn plaetse en sal hem voerts niet meer sien.

10

Sijn kinderen sullen van armoeden verdoruen worden, ende sijn handen sullen hem sijn lijden betalen.

11

Sijn beenderen sullen veruult worden met die ontamelijcheden sijnder ioncheyt, ende die sullen met hem int stubbe slapen.

12

Want alst quaet sal suet wesen in sijnen mont, soo sal hy dat verborghen onder sijn tonghe.

13

Hy salt sparen, ende hy en sal dat niet verlaten, ende hy salt verberghen in sijn kele.

14

Sijn broot sal in sijnen buyck verkeert worden in galle der aderen van binnen.

15

Die rijckdommen die hy opghesloct heeft sal hi wtspouwen, ⁺ende wt sijnen buyck sal Godt die weder wt trecken.

+ C

16

Thooft der slanghen sal hy suyghen, ende die tonghe der aderen sal hem dooden.

17

Hy en moet niet sien die riuierkens vanden vloet, die beken des honichs ende der boteren.

18

Hy salt al met lijden betalen dat hy ghedaen heeft, nochtans en sal hy niet heel vernielt worden, nae die menichte van sijnen vonden, alsoo sal hy te lijden hebben.

19

Want hy heeft die arme in stucken brekende ghebloot, het huys heeft hy berooft, ende hy en heeft dat niet opghetimmert.

20

Noch sijnen buyck en is niet versaet, ende als hy hebben sal dat hy begheert hadde, soo en sal hy dat niet moghen besitten.

21

Daer en es niet ouerbleuen van sijnder spijsen, ende daer om en salder niet gheduerich blijuen van sijnen goeden.

22

Als hij versaet sal wesen, soe sal hy crimpen, ⁺hy sal verhitten ende alle pijne sal op hem vallen.

+ D

23

Och oft sijnen buyck mocht veruult worden, dat hy op hem wt senden mocht die gramscap van sijnen rasenden toren, ende dat hy op hem orloghe reghende.

24

Hy sal vlieden van die ysere wapenen, ende hy sal sterckelijck loopen in den metalen boghe.

25

Het sweert is wtghetrocken ende gaende wt sijn scee, ende blinckende in sijn bitterheyt, die grouwelijcke sullen ouer hem gaen ende comen.

26

Alle die duysternissen sijn verborghen in sijn ooghen, hem sal verslinden tvier dat niet onsteken en wort, die ouerbleuen is in sijn tabernakel sal ghepijnicht worden.

27

Die hemelen sullen sijn boosheyt openbaren, ende die aerde sal teghen hem opstaen.

28

Dat groeytsel van sijnen huyse sal open ghedaen werden, tsal nederghetrocken worden inden dach van Godts rasende gramscap.

29

Dit is des ongoddelijcken menschs deel van Gode, ende die erffelijcheyt sijnder woerden vanden Heere.