Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺DAER was een man int lant Hus die Iob hiet, ende die man was slecht, ende recht, ende God vreesende, ende afwijkende van tquaet,

+ A

2

Ende hem sijn seuen sonen gheboren, ende drij dochteren.

3

Ende sijn goet dat hi besadt was seuen duysent schapen, ende drij duysent kemels, ende vijf hondert paer ossen, ende vijf hondert eselinnen, ende bouen maten seer veel huysghesins, ende die man was groot onder alle die oostwaerts woonden.

4

Ende sijn sonen ghinghen ende hielden maeltijden van huyse te huyse, een ieghelijck op sijnen dach, Ende sij hebben ghesonden, ende hen drij susteren gheroepen, dat sij eten en drincken souden met hen.

5

⁺Ende doen die daghen der maeltijden omghegaen waren, soo sandt Iob tot hen ende hy heylichdese, ende des morghens vroech opstaende offerde hy brantofferanden voor elcken besondere Want hy seyde. By auontueren mochten mijn kinderen ghesondicht hebben ende Godt ghebenedijt in hen herten. Alsoo dede Iob tot allen daghen.

+ B

6

Maer op eenen dach doen Godts kinderen comen waren om te staen voor den Heere, soo heeft Sathan oock onder hen gheweest,

7

Totten welcken heeft die Heere gheseyt. Van waer coemdi? Die welcke antwoordende heeft gheseyt. Ick heb die aerde omme ghegaen, ende die doorwandelt,

8

Ende die Heere heeft tot hem gheseyt. En hebdi niet ghemerct mijnen dienaer Iob, datter sijns ghelijc niet en is op die aerde, een slecht ende recht mensch, ende God vreesende, ende afwijkende van tquaet?

9

⁺Den welcken Sathan antwoordende heeft gheseydt. Vreest Iob Godt oock om niet?

+ C

10

en hebt ghi hem niet beheymt ende sijn huys, ende alle sijn goet int ronde, sijnder handen werc hebt ghy ghebenedijt, ende sijn besittinghe is ghewassen op die eerde?

11

Maer reyct wt een luttelken v hant, ende raect alle dat hy besidt, ten sij dat hy v in daensicht ghebenedijde.

12

Hierom heeft die Heere gheseyt tot Sathan. Siet al dat hy heeft is in hant, alleen en steect v hant aen hem niet, Ende Sathan is van daensicht des Heeren ghegaen.

13

Ende als op eenen dach sijn sonen ende dochteren aten ende wijn droncken in haers ierste gheboren

[p. *425]

broeders huys,

14

so isser een bode ghecomen tot Iob, die welcke seyde. Die ossen ackerden, ende die eselinnen weydden daer by,

15

Ende die Sabeen sijn haestelijc daer in gheuallen, ende sij hebbent al ghenomen, ende die knechten hebben sij metten swaerde gheslagen, ende ick bent alleen ontuloden dat ict v bootscappen soude.

16

Ende die wijle dat die noch sprac, so isser een ander ghecomen, ende heeft geseyt. Gods vier is vanden hemel geuallen, ende theeft die scapen ende knechten vernielt, ende ick bent alleen ontuloden, ⁺dat ict v bootscappen soude,

+ D

17

Ende doen die noch sprack soo isser een ander ghecomen ende heeft gheseyt. Die Chaldeen hebben drij hoopen gemaect ende si hebben die kemelen oueruallen, ende die wechgenomen, ende die knechten hebben sy metten sweerde verslagen, ende ick ben alleen ontuloden, om dat ict v bootscappen soude.

18

Dese sprack noch, ende siet daer is een ander incomen, ende heeft gheseyt. Doen v sonen ende dochteren wijn droncken in haer ierste geboren broeders huys,

19

so is onuersienlijc eenen crachtigen wint ghecomen van dat lantscap der woestijnen, ende heeft te samen ghestooten die vier hoecken vanden huyse, het welck vallende heeft v kinderen verdruct, ende sij sijn gestoruen, ende ick bent alleen ontuloden om dat ict v bootscappen soude.

20

Doen is Iob opgestaen, ende heeft sijn cleederen gescoert, ende sijn hooft ghescoren hebbende, nederuallende ter aerden heeft hy aenbeden

21

ende gheseyt. Naect ben ick gecomen wt mijns moeders lichaem, ende naect sal ic weder derwaerts keeren. Die Heere heuet ghegeuen, die Heere heuet wech ghenomen, ghelijct den Heere belieft heeft, alsoo eest ghesciet, den naem des Heeren sij gebenedijt.

22

In alle dese dinghen en heeft Iob niet ghesondicht met sijnen lippen, noch iet dwaesselijcs tegen Godt ghesproken.