Den gheheelen Bybel, Inhoudende het oude ende nieuwe Testament (Leuvense bijbel 1548)

Het ierste Capittel.

1

⁺TObias wt dat gheslachte ende stadt van Nephthali welc is gheleghen in die ouerste plaetsen van Galileen bouen Naasson, achter den wech die westwaerts leydt, aen die slincke sijde hebbende die stadt Sephet,

+ A

2

doen hij gheuanghen was in die daghen van Salmanasar den coninck van Assyrien, nochtans in die gheuanghenisse ghestelt, en heeft hij den wech der waerheyt niet verlaten,

3

also dat hij alle dat hij hebben mocht daghelijcs sijnen mede gheuanghen broederen die van sijnen gheslachte waren deylde.

4

Ende hoe wel hij die alder ioncste was van allen int gheslachte van Nephthali, soo en heeft hij nochtans niet kintslijck ghedaen metten wercken.

5

⁺Voerts meer doen sij alle ghinghen tot die gulden calueren die Ieroboam ghemaect hadde die coninck van Israel, dese alleen vliede tgheselscap van hen allen,

+ B

6

ende hij reysde te Ierusalem tot des Heeren tempel, ende daer aenbadt hij den Heere den Godt van Israel, alle sijn ierste vruchten, ende sijn thienden ghetrouwelijck offerende,

7

also dat hij ten derde iare den nieuwelinghen ende vreemdelinghen diende alle die thiendinghe.

8

Dese ende der ghelijcke dinghen onderhiel hij na Gods wet noch een cleyn kint synde.

9

Maer doen hij een man gheworden was, soo heeft hij een huysvrouwe ghenomen Annam van sijnen gheslachte, ende hij heeft van haer ghewonnen eenen sone, hem gheuende sijnen naem,

10

den welcken hij van sijnder kintscheyt heeft gheleert Godt vreesen, ende hem onthouden van alle sonden.

11

Aldus doen hi door die gheuanghenisse ghecomen was met sijn huysvrouwe ende sijnen sone in die stadt Niniue, met alle sijn gheslachte,

12

ende doen sij alle aten van die spijsen der heydenen, so heeft dese sijn ziele bewaert, ⁺ende hij en is noit besmet gheweest met haren spysen.

+ C

13

Ende om dat hij des Heeren ghedachtich was met alle sijn herte, soo heeft hem Godt gratie ghegheuen voor daensicht Salmanasar des conincs van Assyrien,

14

ende hij heeft hem die macht ghegheuen te gaen waer dat hij wilde, hebbende vrijheyt te doen al wat hij wilde.

15

Hier om soo reysde hij tot alle die ghene die in die gheuanghenisse waren, ende gaf hen vermaninghen der salicheyt.

16

Ende doen hij comen was te Rages een stadt der Meden, ende onder tghene daer hij vanden co-

[p. *400]

ninck meede gheeert was, hadde thien talenten siluers,

17

ende doen hij onder een groote schare van sijnen geslachte Gabelum sach ghebreck lijdende, die wt sijnen gheslachte was, soo heeft hij hem onder een hanteeken dat voorseyde ghewicht siluers ghegheuen.

18

Maer nae veel tijts als Salmanasar die coninc doot was, doen Sennacherib sijn sone regneerde in sijn stede, ende hij die kinderen van Israel haettede voor sijn aensicht,

19

⁺soo ghinck Tobias daghelijcs door alle sijn gheslachte, ende hij troostese, ende hij deylde eenen ieghelijcken nae dat hij vermocht van sijnen goede,

+ D

20

die hongheringhe voedde hij, ende den naecten gaf hij cleederen, ende die doode, ende verslaghenen dede hij naerstelijck ten graue.

21

Daer nae doen die coninck Sennacherib wederom ghecomen was van Iudeen vliedende die plage welcke ouer hem Godt ghedaen hadde, om sijn blasphemie, ende hij gram sijnde veel vanden kinderen van Israel dootsloech, soo begroef Tobias hen lichamen.

22

Ende doent den coninck ghebootscapt was, soo heeft hij gheboden datmen hem dooden soude, ende hij nam alle sijn goet.

23

Maer Tobias met sijnen sone ende met sijn huysvrouwe vliedende is naect verborghen gheweest, want vele hadden hem lief.

24

Maer nae vijfenveertich daghen hebben den coninck sijn selfs sonen doot gheslaghen,

25

ende Tobias is wederom comen in sijn huys, ende alle dat hij hadde is hem wederghegheuen.