Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvi. Capittel.

1

⁺VVEe v Babylon ende Asia, wee v Egipten ende Syria,

+ A

2

omgort v met sacken ende haire cleederen, ende beweent v kinderen, ende maect rouwe, want v vernielinghe is ghenaect.

3

Het swaert is onder v lieden ghesonden, ende wie isser die dat afkeeren sal?

4

Daer is een vier onder v lieden ghesonden, ende wie isser diet wt blusschen sal?

5

Quade dinghen sijn op v ghesonden, ende wie isser diese afkeeren sal?

6

Sal iemant moghen eenen hongherighen leuw int wout veriaghen? oft sal hij moghen wtblasen een vier inde stoppelen ter stont alst heeft begonst te berren?

7

Sal iemant connen afdrijuen een ghescut van eenen stercken scutter ghescoten?

8

Die stercke Heere sent quade dinghen toe, ende wie isser diese sal verdrijuen?

[p. *398]

9

daer es vier wt sijnder gramscappen ghegaen, ende wie esser die dat sal wt blusschen?

10

Hy sal blixemen, ende wie en sal niet vreesen? Hy sal donderen, ende wie en sal niet beuen?

11

Die Heere sal dreyghen, ende wie en sal niet grondelijck vernielt worden van sijn aensicht?

12

Die aerde heeft ghebeeft ende haer fundamenten. Die zee worpt vloeden op wt die diepte, ende haer vloeden sullen breet verstoort worden, ende haer visschen van des Heeren aensicht, ende van die glorie sijnder macht,

13

Want sterck is sijn rechte hant, die den boghe spant, sijn scichten sijn scerp, die van hem ghescoten worden, sij en sullen niet ontbreken, als sij sullen beghinnen ghescoten te worden tot die eynden der aerden.

14

Siet die quade dinghen worden ghesonden, ende sij en sullen niet weder om keeren, tot dat sij comen sullen op die aerde.

15

Het vier sal onsteken worden ende niet wt ghebluscht, tot dat verteere die fundamenten der aerden.

16

Ghelijck eenen pijl niet weder en keert die van eenen vromen scutter ghescoten is, alsoo en sullen die quade dinghen niet wederkeeren die ghesonden sullen worden op der aerden.

17

Wee my, wee my, wie sal my verlossen in dien daghen?

18

Tbeghinsel der smertten, ende veel suchtinghen. Tbeghinsel des honghers, ende van veel vernielinghe. Dat beghinsel der orloghen, ende die machtighe sullen vreesen dat beghinsel der quader, ende sij sullen alle veruaert sijn. Wat sal ick desen doen als die quade dinghen comen?

19

Siet hongher, ende plaghe, ende tribulatie, ende benauthede, sijn ghesonden gheesselen, ter beternissen.

20

Ende in alle dese dinghen en sullen sij hen niet bekeeren van haren boosheden, noch sij en sullen der gheesselen altijt niet ghedachtich wesen.

21

Siet den lyfcost sal goeden coop wesen op der aerden, alsoo dat sij meynen sullen dat den vrede hen toe ghescict is, ende dan sullen die quade dinghen op die aerde groeyen, dat swaert, den hongher, ende groot bescaemptheyt.

22

⁺Want vanden hongher salder vele die op die aerde woonen vergaen, ende dat swaert sal die andere vernielen die vanden hongher ouerbleuen sullen sijn,

+ B

23

ende die dooden sullen als mest wech gheworpen worden, ende daer en sal niemant sijn diese vertrooste. Want het lant sal verwoest ghelaten worden, ende sijn steden sullen neder gheworpen worden.

24

Daer en sal niemant ghelaten werden die tlant mocht bouwen, ende diet besayen moecht.

25

Die houten sullen vruchten gheuen, ende wie sal die plucken?

26

Die druyuen sullen rijp worden, ende wie salse treeden? Want den plaetsen sal groote verlatinghe sijn.

27

Want deen mensch sal begheren eenen anderen mensch te sien oft sijn stemme te hooren,

28

Want daer salder vander stadt thien achter ghelaten worden, ende twee vanden ackerlande, die hen verborghen sullen hebben in die dicke bosschagie, ende in die spleten der steenroetsen,

29

ghelijck in die olijfgaerde ende op elcken boom ghelaten worden twee oft drij oliuen,

30

oft ghelijck in eenen wijngaert diens wijn af ghesneden is, ghelaten worden wijn druyfkens vanden ghenen die den wijnagert naerstelijck ondersoecken,

31

Alsoo sullender in die daghen drij oft vier ghelaten worden, van den ghenen die hen huysen doorsoecken metten swaerde.

32

Ende dlant sal woest ghelaten worden, ende haer ackeren sullen verouderen, ende haer weghen, ende allen haer paden sullen doornen voortbrenghen, om dat die menschen daer niet ouergaen en sullen.

33

Die maechden sullen weenen, gheen brudegoms hebbende. Die vrouwen sullen weenen gheen mans hebbende, Hen dochteren sullen weenen gheen helpe hebbende,

34

Hen brudegoms sullen in die orlooghe vernielt worden, ende hen mans sullen van hongher vergaen.

35

Maer hoort dese dinghen ende bekentse ghij des Heeren knechten.

36

Siet des Heeren woort, ontfanct dat, en ghelooft den goden niet, vanden welcken die Heere seyt,

37

Siet die quade dinghen naken, ende sij en merren niet.

38

⁺Ghelijck een beuruchte vrouwe als sij in die neghenste maent baert haeren sone, als die vre van haer baringhe aencoemt, twee oft drij vren te voren, soo omuanghen die pijnen haren buyck, ende als dat kint wt den buyck coemt, soo en sullen die niet eenen ooghenblick vertoeuen,

+ C

39

alsoo en sullen die quade dinghen niet vertoeuen om te comen op die aerde, ende die werelt sal suchten, ende weedommen sullen die al omhouden.

40

Hoort dat woort mijn volck, Bereyt v ten strijde, ende in die quade dinghen weest alsoo ghelijck die vremdelinghen des lants,

41

Die vercoopt sij als die vliedt, ende die coopt sij als diet verliesen sal.

42

Die comenscap doet sij, als die gheen vrucht en ontfanct, ende die timmert sij als die daer niet in woonen en sal.

43

Die saeyt sij ghelijck die niet maeyen en sal. Alsoo oock die eenen wijngaert snoeyt, sij als een die den wijn niet aflesen en sal.

44

Die trouwen, sullen sijn als die gheen kinderen en sullen winnen, ende die niet en trouwen, sullen sijn ghelijck weduwers.

45

Daer om die arbeyden, die arbeyden sonder sake,

46

want hen vruchten sullen vreemdelinghen mayen, ende hen goet sullen sij roouen, ende hen huysen om werpen ende hen kinderen sullen sij vanghen, want in die gheuanghenisse ende hongher winnen sij haer kinderen.

47

Ende die comenscap doen, in den roof, soo langhe als sij haer steden vercieren, ende haer huysen, ende haer besittinghe ende haer persoonen,

48

soo veel te meer sal ick tot hen mijn straffende liefde toonen op hen sonden, seyt die Heere.

49

Ghelijck een oneerbaer vrouwe wantrouwelijck benijt een bequame ende zeer goede vrouwe,

50

alsoo sal die rechtuaerdichheyt, die boosheyt wantrouwende benyden, als die haer verciert, ende besculdichtse in haer aensicht, als hij sal comen sijn die verantwoorden sal, den ghenen die ondersoeckende is alle sonde op der aerden,

51

Daer om en wilt haers niet ghelijck worden, noch sijnen wercken,

52

want noch een luttelken, ende die boosheyt sal vander werelt ghenomen worden, ende die rechtuerdicheyt sal ouer v regneren.

53

Die sondaer en seg niet dat hij niet ghesondicht en heeft, want hij sal vierighe colen verbranden op sijn hooft. Die seyt, Ick en heb niet ghesondicht voor den Heere Godt, ende voor sijn glorie.

54

Siet die Heere sal kennen alle die wercken der menschen, ende hen vonden, ende hen ghedachten, ende hen herten.

55

Want hij heeft gheseyt, Ghemaect worde die aerde, ende sij worde ghemaect. Ghemaect worde den hemel, ende hij worde ghemaect,

56

ende door sijn woort sijn die sterren ghefundeert, ende hij weet tghetal der sterren.

57

Die de afgronden doorsuect, ende haere scatten. Die de zee ghemeten heeft, ende haer begrijp.

58

⁺Die de zee besloten heeft int midden der wateren, ende heeft die aerde bouen die wateren ghehanghen met sijnen woorde.

+ D

59

Die den hemel wt ghespannen heeft als een ghewelfte, op die wateren heeft hij dien ghefundeert.

[p. *399]

60

Die in die woestijne ghestelt heeft water fonteynen, ende op die toppen vanden berghen groote poelen, om vloeden wt te laeten, van die hooghe wtstekende steenroetse, om die aerde te wateren.

61

Die den mensch ghemaect heeft, ende heeft sijn herte ghestelt int midden des lichaems, ende heeft hem ghesonden eenen gheest, leuen, ende verstant,

62

ende dat inblasen des almachtighen Gods diet al ghemaect heeft, ende doorsoect alle die verborghen dinghen, in die verborghentheden der aerden.

63

Dese kent uwe wonde, ende dat ghij denct in v lieden herten sonde doende, ende willende verborghen uwe sonden.

64

Waer om heeft die Heere doorsoeckende doorsocht alle uwe wercken, ende hij sal v allen openbaer maken,

65

ende ghij sult bescaemt wesen, als v sonden sullen int openbaer comen voor die menschen, ende die boosheden sullen sijn, die daer staen sullen als besculdighers in dien daghe.

66

Wat suldi doen? oft hoe suldi uwe sonde verborghen voor den Heere ende sijn enghelen?

67

Siet Godt is die rechter, vreest hem, Laet af van uwe sonden, ende vergheet uwe boosheden nv te doen inder eewicheyt, ende Godt sal v wtleyden ende verlossen van allen tribulatien,

68

want siet ouer v is ontfunct die hitte ghij ouervloedighe scaren, ende sij sullen sie sommighe van v lieden metter macht nemen, ende sij sullen die verslaghene den afgoden tot een spyse offeren,

69

ende die hen consenteren, sullen hen tot eenen spot wesen, ende tot een verwijt, ende tot een vertredinghe,

70

want den plaetsen sal plaetse wesen, ende teghen die bijligghende steden sal eenen grooten oploop sijn op die ghene die den Heere vreesen.

71

Sij sullen sijn ghelijck ontsinnighe, niemande sparende, om te beroouen ende te verderuen die ghene die noch den Heere vreesen.

72

Want sij sullen verderuen ende beroouen die substancien, ende van haren huysen sullen sij die wt worpen.

73

Dan sal daer blijcken die proeuinghe van mijnen wtuercorenen, ghelijck tgout dat gheproeft wort vanden viere.

74

Hoort mijn beminde, seyt die Heere, Siet die daghen der tribulacien sijn teghenwoordich, ende van dien sal ick v verlossen.

75

Ende wilt niet vreesen noch twijfelachtig sijn, want Godt is v leydtman,

76

Ende die mijn beuelinghen ende gheboden onderhoudt seyt die Heere Godt, en laet v sonden niet v verweghen, op dat uwe boosheden hem niet en ouerheffen.

77

Wee den ghenen die van haren sonden ghebonden worden, ende bedect van haren boosheden, ghelijck eenen acker benaut wordt van een bosch, ende als eenen wech met bomen ouerdect wort, daer gheen mensch doer en gaet,

78

ende wort wtghesloten ende ghesonden tot dat verslinden des viers.

Hier eyndet dat vierde ende laetste boeck Esdre.