Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺DEN tweeden boeck Esdre des propheets, des soens Sarei, des soens Azarei, des soens Helcie, des soens Sadanie, des soens Sadoch, des soens Achitob,

+ A

2

des soens Achie, des soens Phinees, des soens Heli, des soens Amerie, des soens Asiei, des soens Marimoth des soens Arna, des sons Ozie, des soens Borith, des soens Abisei, des soens Phinees, des soens Eleazar,

3

des soens Aaron wt den gheslachte van Leui, die gheuanghen was int lantschap vanden Meden, int conincrijck Artaxersis des conincs van Persen.

4

Ende het woert des Heeren is tot my ghedaen seggende,

5

Gaet henen ende vercondicht mijnen volcke hen groote misdaden ende haren kinderen die boosheden, die sij teghen my bedreuen hebben, dat sijt vercondighen haerder kints kinderen,

6

want die sonden van haren ouders sijn in hen groot ghewassen, want sij hebben mijns vergheten, sij hebben sacrificie ghedaen den vreemde goden.

7

En heb icse niet gheleyt wt dat lant van Egypten, wt dat huys der slauernien? Ende sij hebben my ghecreyt, ende mijn raden versmaet,

8

maer scudt ghy wt dat hayr ws hoofs, ende worpt alle tquaet op hen, want sij en hebben mijnder wet niet ghehoorsaem gheweest. Maer het is een onbedwonghen volck.

9

Hoe langhe sal icse verdraghen, den welcken ic soe grooten weldaden ghegheuen hebbe?

10

Veel coninghen heb ick om haren wille verdoruen, ⁺Pharaonem met sijnen knechten ende alle sijn heyr heb ick verslaghen.

+ B

11

Alle die heydenen heb ick van voer hen aensicht vernielt, ende in oosten heb ick tvolck van twee lantscappen Tyrien ende Sidonien verstrooyt, ende allen hen vianden heb ick ghedoot.

12

Maer spreect ghy tot hen segghende, Dit seyt die Heere,

13

Voerwaer ick heb v doer die zee gheleyt ende voor v van tbegin besloten straten ghemaect, ende v eenen leytsman ghegheuen Moysen ende Aaron den Priester.

14

Ic heb v licht doer die columne des viers ghegheuen, ende groote wonderlijcke dinghen heb ick in v lieden ghedaen, maer ghy hebt my vergheten, seyt die Heere.

15

Dit seyt die Heere almachtich, Die quackelen waren v tot een teeken die heyrleghers heb ick v tot een bescermen ghegheuen, ende daer hebdi ghemurmureert,

16

ende ghy en hebt niet ghetriumpheert in mijnen naem van uwer vianden verderffenisse, maer tot nu toe hebdi noch ghemurmureert.

17

Waer sijn die weldaden die ick v ghedaen hebbe? En hebdi in die woestijne doen ghy hongher hadt tot my niet gheroepen

18

segghende, waer toe hebdi ons in dese woestine gebracht om ons te dooden? Het was ons beter te dienen den Egyptenaren, dan te steruen in dese woestijne.

19

Ick hadde medelijden op v suchten, ende heb v ghegheuen manna tot spijse. ⁺Der Enghelen broot hebdi gheten.

+ C

20

En heb ick niet (doen ghy dorst hadt) die steen roetsen open ghedaen ende daer sijn wateren wt ghevloten tot versaetheden? Om die hitte heb ick v met die bladeren der boomen bedect.

21

Ick heb v lieden ghedeelt vette landen. Die Chananeen ende Pherezeen ende Philistheen heb ick verdreuen voer v aensicht, wat sal ick v noch doen, seyt die Heere?

22

Dit seyt die almachtighe Heere, In die woestijne doen ghy dorstich waert aen die Amorreytsche wateren, ende blasphemerende mijnen naem,

23

soe en heb ick v gheen vier voor v blasphemien ghegheuen, maer worpende een hout int water heb ick den vloet soet ghemaect.

24

Wat sal ick v doen Iacob? Ghy en hebt niet willen onderdanich sijn Iuda. Ic sal ouer trecken tot andere volcken, ende ick sal hen mijnen naem gheuen, dat sij mijn wettelijcheden bewaren.

25

Want ghy my verlaten hebt, soe sal ick v lieden oock verlaten.

26

Als ghy van my bermherticheyt sult begheren, soo en sal ick niet ontfermen. Als ghy my aenroepen sult, soe en sal ick v niet verhooren, want ghy hebt v handen besmet met bloede, ende v voeten sijn rasch om dootslaghen te doen.

27

Niet als oft ghy my verlaten hadt maer ghy hebt v seluen verlaten, seyt die Heere,

28

Dit seyt die almachtighe Heere, En heb ick v niet ghebeden als een vader sijn sonen, ende als een moeder haer dochteren, ende ghelijck een voester haer cleyn kinderkens,

29

dat ghy my tot een volck sijn soudt, ende ick v lieden tot eenen Godt, ende dat ghy my soudt wesen tot kinderen, ende ick v tot eenen vader?

30

Ick heb v alsoe vergadert ghelijck een Hinne haer kiexkens onder haer vloeghelen. Maer nu wat sal ick v doen? Ick sal v verworpen van mijn aensicht.

31

⁺Als ghy my een offerande brenghen sult, soe sal ick mijn aensicht van v keeren. Want v feestdaghen ende v nieuwe manen ende v besnydenissen heb ick verworpen.

+ D

32

Ick heb mijn kechten die propheten aen v ghesonden, die welcke ghy ontfanghende hebt ghedoot, ende ghy hebt hen lichaemen verschoert, der welcker bloet ick versoecken sal, seyt die Heere,

33

Dit seyt die almachtighe Heere, V huys is verwoest. Ick sal v wech worpen ghelijck den wint dat stroo,

34

ende die sonen ende sullen gheen afcoemste crijghen, om dat sij mijn ghebodt veracht hebben, ende hebben voer my ghedaen dat quaet is.

35

Ick sal v huysen leueren den comenden volcke die my niet hoorende, gheloouen, den welcken ick gheen teekenen en heb ghetoont, die sullen doen tghene dat ick gheboden hebbe.

36

Sy en hebben die propheten niet ghesien, ende sij sullen haer boosheden ghedencken.

37

Ick neem te ghetuyghe des toecomenden volcs gratie, wiens cleyn kinderen hen verhueghen met blijscappen, my niet siende met vleeschelicken ooghen, maer inden gheest gheloouen dat ick gheseyt hebbe.

38

Ende nu broeder aensiet wat glorie, ende siet een volck comende vanden oosten,

39

den welcken ick gheuen sal een gheleyde van Abraham, Isaac, ende Iacob, ende Osee, ende Amos, ende Micheas, ende Ioel, ende Abdias, ende Ionas,

40

ende Naum, ende Habacuc, ende Sophonias, ende Aggeus, Zacharias, ende Malachias die welcke oock den Enghel Gods ghenoemt is.