Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺INt ierste iaer Cyri des conincs van Persen (om dat volbracht soude worden dwoert des Heeren wt den mont van Ieremias) soe heeft die Heere verwect den gheest van Cyrus den coninck van Persen, ende hy heeft openbaerlijc doen wtroepen een stemme ouer alle sijn rijc oock doer scriftuere, seggende,

+ A

2

Dit seyt Cyrus die coninc van Perssen. Alle die rijcken van aertrijcke heeft my ghegeuen die Heere die Godt des hemels, ende hy heeft my gheboden dat ic hem een huys timmeren soude in Ierusalem welc is in Iudeen.

3

Wie isser van v lieden onder alle sijn volc? ⁺Sijn Godt sij met hem, hy climme op nae Ierusalem welck is in dioetsche lant ende timmere dat huys des Heeren des Gods van Israel. Hy is die Godt die te Ierusalem is.

+ B

4

Ende alle die ander in allen plaetsen, al waer dat sij woonen, hen sullen helpen die mannen van haerder plaetsen met gout ende siluer ende substancie, ende cleyn vee, wtghenomen t ghene dat sij vrijwillichlijc offeren den tempel Gods, die te Ierusalem is.

5

Ende daer sijn opghestaen die princen der vaderen van Iuda ende Beniamin ende die priesteren ende Leuiten, ⁺ende alle die ghene wiens gheest die Heere verwect hadde, dat hy optrecken soude om te timmeren den tempel des Heeren, die te Ierusalem was.

+ C

6

Ende alle die ghene die rontsomme waren hebben gheholpen door hare handen met silueren ende gulden vaten, met substancie ende lastdraghende beesten, met huysraet, wtghenomen die dinghen die sij vrijwillichlijck gheoffert hadden.

7

Ende die coninck Cyrus heeft ooc voerts bracht die gheretscappen van des Heeren tempel, die Nabugodonosor ghebracht hadde van Ierusalem ende die ghestelt in sijns Gods tempel.

8

⁺Ende Cyrus die coninc van Persen bracht die voerts door die hant van Mithridatis Gazabars sone, ende heeft die by ghetale gheleuert, Sassabasar den prince van Iuda.

+ D

9

Ende dit is hen ghetal. Gulden schalen dertich, ende duysent silueren schalen, neghen ende twintich messen, dertich gulden croesen,

10

die tweede silueren croesen vierhondert ende thiene, duysent ander ghereetscappen.

11

Alle die vaten gulden ende silueren, waren vijfduysent ende vierhondert. Alle dese heeft Sassabasar ghebracht met die ghene die optrocken van die oueruoeringhe van Babilonien te Ierusalem.