Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxiiij. Capittel.

1

⁺ALdus is Moysus opgheclommen van dat plat lant van Moab op den berch Nebo, opden tsop van Phasga teghen ouer Iericho, ende die Heere heeft hem ghetoont alle dlant van Galaad tot Dan toe,

+ A

2

ende alle dlant van Nephthali, ende dlant van Ephraim ende Manasse, ende alle dlant tot aen die wterste zee

3

ende tot die zuytsijde, ende die breetheyt van dat plat lant van Iericho der palmen stadt, tot Segor toe.

4

Ende die Heere heeft tot hem gheseyt, ⁺Dit is dlant daer om dat ic Abraham Isaac ende Iacob ghesworen hebbe, segghende, Ick sal dit uwen sade gheuen, Ghy hebt dat met uwen ooghen ghesien, ende ghy en sult tot daer niet ouerghaen.

+ B

5

Ende Moyses des Heeren dienaer is daer ghestoruen in dlant van Moab, door des Heeren beuel,

6

ende hy heeft hem begrauen in dat dal des lants van Moab, teghen ouer Phogor, ende gheen mensch en heeft sijn graf gheweten tot op desen dach toe.

7

⁺Moyses was hondert ende twintich iaren out als hy sterf, sijn ooghen en waren niet verduystert, noch sijn tanden en waren niet verroert.

+ C

8

Ende die kinderen van Israhel hebben hem beweent in dat plat lant van Moab, dertich daghen lanck, ende die screydaghen der gheender die Moysen bescreyden sijn volbracht gheweest.

9

Maer Iosue

[p. *183]

Nuns sone is met den gheest der wijsheyt veruult, want Moyses hadde sijn handen op hem gheleyt. Ende die kinderen van Israhel hebben hem onderdanich gheweest, ende ghedaen alsoo die Heere Moysi beuolen hadde.

10

⁺Ende daer en is voorts noyt sulcken propheet in Israhel opghestaen als Moyses was, den welcken die Heere kende van aensicht te aensichte,

+ D

11

door alle die teekenen ende wonderlijcke wercken, welck die Heere door hem ghesonden heeft om te doen in dlant van Egipten Pharao ende alle sijnen knechten, ende alle sijnen lande,

12

ende alle die machtighe handt, ende die groote wonderen die Moyses ghedaen heeft voor alle die kinderen van Israhel.

Hier voleyndt dat boeck Deuteronomium, dat vijfde ende leste boeck Moysi.