Die gheestelicke melody

Van Sinte Margriet joffrouw

God gruet u, suver maecht Margriet.
God gruet u, uutvercoren.
Ic bid ju dat gi my aensiet
End mijn ghebet wilt ho[71r]ren.
Och, troest my doch in mijn verdriet
Dat my dic coemt te voren.

Ic bin bedroeft en seer versaecht,
Als ic denc om mijn leven
End reden moet, alst Goy behaecht,
Voer al mijn sonden gheven.
Ic vrees, ic zal zeer sijn beclaecht,
Mit recht mach ic wel beven.

Nu, lieve maecht, mijn troest sy dy
End oec mijns herts begheren.
Ic bid u, staet my nu doch by
Tot uwer brugoms eeren,
End bidt hem dat hi my maect vry
Van [71v] al dat my mach deren.

Ic bidt u dat gi my verblijt,
O scoender creaturen.
Ic hoep u dienre te sijn altijt
So lang ic sal ghedueren.
Des viant strick aen stucken snijt,
Uut sijn macht wilt my vueren.

Een draecs figuer so nam hi aen
End quam op u gheberen.
Gi hadt die gracy Goots ontfaen,
Hi en cond u nijt ververen.
Gi waert seer bout ende onversclaen,
Al waert gi jonc van jaren.

Hi wert al seer, al waer gi teer,
Somtijt van u ghescleghen.
Ghi [72r] worpten neer, hi sonder weer
Nam disciplijn te deghen.
Van Jhesu, onsen lieven heer,
Had gi die macht ghecregen.

Nu lieve maecht, siet my doch aen,
Wilt horen mijn ghebeden.
Helpt my die gracy oec ontfaen,
Die gi hadt hier beneden:
Den viant altijt wederstaen,
Mit Jhesu tsijn in vreden.

Lof, eer si u in hemmelrijc
End alle Goots vreendinnen.
Helpt suster Lutghert trouwelijc
End my, die sy uut mynnen
Tot Jhesus eer heeft guetelijc
Dit boecskijn doen be[72v]ghinnen.

Oec wilt haer broederkijns bistaen,
Haer susterkijns te samen,
Als ic vermoy end waerlic waen,
Die alte gheerne namen
So vroe als sy van hene gaen
Dat sy vlus bi u quamen.

O heylighe Drievoudicheyt,
Een wesen, drie personen,
Lof sy u in der ewicheyt
End vruechd die mit u woenen.
Verleent ons nu oetmoedicheyt
End daerna wilt ons croenen. Amen, amen.