Ic sie den dach int Oest opgaen
Want die ziel suete contem[34v]placy ghehadt heeft van hemmelrijc,
so dunct haer dat alle die ghenuechten vander werrelt ydelheyt is, want sy
verghanckelic is. Hierom so spreket sy dat die gheen hem alre best bewaren die
hem alleen op God verlaten.
Ende een goede lering mach men uut dit hymmeken trecken. Dat is dit:
so wat sueticheyt dat men verneemt, het si in sien, in horen, in ruken, in
smaken of in ghevolen, dat men die terstont geliket by hemmelrijc ende denct:
‘Och, is dit dus suet ende ghenuechlic hier op eertrijc, daer alle
dinghen verganckelic sijn, hoe scoen ende ghenuechlic moe[35r]tet dan sijn in
hemmelrijc, daer alle dinghen hondert dusent werve zueter sijn ende scoenre
ende ewelicke durende.’
Ghebet
Ic sie den dach int Oest opgaen.
O Jhesu lief, wilt my bistaen,
Verleent my desen dach tontfaen
Mit dancberheit in uwe naem
5[regelnummer]
End alle sonden wederstaen.
O Jhesu lief, ic roep u aen,
Wilt my mit uwe myn bevaen
Opdat ic u mach sijn bequaem
End so des viants strick ontgaen.
10[regelnummer]
Die sonne scoen end claer opgaet.
Och heer, vergheeft my mijn misdaet
End weet my anders ghenen raet
Te [35v] comen inder vruechden graedt.
Gi sijt mijn hoep, mijn toeverlaet,
15[regelnummer]
Al mijn ghenade aen u staet.
O Jhesu lief, nu van my sclaet
Mijn sonden, boesheit ende quaet
End set my inder duechden straet.
Die voghelkijns sijn blidelic,
20[regelnummer]
Die bloemkijns bloeyen suverlic,
Die lelikijns spruten gracelic,
Die roeskijns ruken suetelic.
Hoe scoen moet sijn in hemmelrijc,
Daer alle dinck ontsprekelic
25[regelnummer]
Veel scoenre is, ya onghelijc,
Dant wesen mach hier op eertrijc.
Och heer, haelt my daer cortelijc.
Wat baet dees vruechd die men aensiet?
Sy coemt ghering [36v] end gaet seer vliet,
30[regelnummer]
Sy is nu end schier is sy niet,
Wat ist anders dan groot verdriet,
Al dat hier op eertrijc ghesciet?
Hierom hi him seer weel beriet
Die hem alleen op God verliet
35[regelnummer]
End deed ghelijc als hi ghebiet,
Der werrelts vruechde afterliet.
O Jhesu, heer der reynicheyt,
Gi sijt daer al mijn troest aen leyt.
Ic myn veel meer u zueticheyt
40[regelnummer]
Dan alder werrelt suverheit.
Ic bid u goedertierenheyt,
Verleent mijn hert oetmoedicheyt
Opdat ic u mach sijn bereyt
End dienen mit ghestadicheyt.
45[regelnummer]
Lof sy u inder ewicheyt. Amen.
Auteursrechtelijk beschermd