|
| |
III. Dit is dat nuwe regiment.
§. 31.
In den naem Ons Heren, Amen. Enen yeghelijcken die dese tegenwordige litteren sullen aensien, Johannes by der gratien Gods, busscop van Ludick, ende Zacheus van Vranckenhove by derselver ghenaden abt des cloesters van St. Truyden, des Crisdoms van Ludick, der orden St. Benedicti, ynnichlijcke gruet in Christo. Totten loffelijcken regimente ons gheheelen cudde oft scare aengenomen, soe werden wy nerstelijck bedwongen stadelijck te overpeysen hoe dat wy dat volck,ons bevolen ende onderdaen, mogen guberneren ende regeren onder vriheit ende bescerminghen des peys, ende dy dolende ende wederspennyge van honre vermetelijcker stouter ghewoenten ten weghe honre salicheit ende vredelijcken ende tot eersamer conversatien mogen wederom leyden, daer omme merckende onse voerseide stadt van St. Truyden om die menygerhande versceydenheit hons regiments, die welcke nyet
| |
| |
luttel dicwyl verveernysse, armoede ende scade geleden heeft , ende die borgers onser stadt voerseit onder hon wedersprake, rancoer ende tweedracht, overmyts orsake des voerseiden regiments, uuten welcken merckelijcke quade mochten honnen oerspronck decwil ghehadt hebben, ende daer omme, alsoe wy sculdich sijn, willende den voerseiden periculen tegencomen, nyet alleene ter beeden onser voerseide borgeren onser stadt, mer oeck der anderen ons bisdoms voerseit goeder dorpen, die van den voerseyden graciosen giften ons oeck oetmoedelijck ghebeden by den staet ende eere onser voerseider stadt di te regeren. Hierop met ryper deliberatien ende ernstigen tractaten ghehadt met eendrachtighen consenten dy ordinantien, reformatien, statuten ende moderatien onder aen bescreven den voerseiden onsen borgers, tegenwoerdich ende toecomende, also dat onder gedeclareert is, geven ende verleenen wy, ende by desen tegenwordigen geven wy ewelijck te duren.
| |
§. 32. Van kiesinghen der borghemeesteren ende raetsluyden.
In den eersten, soe willen wy ende consenteren dat van nu voert sijn ende sullen sijn in onser stadt van St. Truyden voerseit ‧xij‧ ambachten, dy welcke alle jare des eersten dage na Dertien-dach, in een seker plaetse derselver stadt, vergaderen sullen ‧xxiiij‧ personen van den alre wijsten: te weten, van eenen yegelijcken ambachte twee, by eendracht ende ghevolghe des meestendeels van den ambachten voerseit, die sullen noemen ende kiesen den voerseiden heren nae den coer te presenteren; uuten welken twee in yeghelijck ambacht
| |
| |
aldus ghecoren sijnde ende voer ons, als voerseit is, ghepresenteert; wy busscop ende abt voernoemt, eenen dy voer dat toecomende jaer ghesworen raetsman sal sijn, ende den anderen die voer dat selve jaer sal deken sijn oft provisoer; ende van den regimente der stadt voerseit te onderwynden, te weten, wy busscop sullen kiesen in d'eerste jaer uuten sesse ambachten sesse in raetsmannen ende sesse in dekenen, ende wy abt uuten sesse anderen ambachten sesse in raetsmannen ende sesse in dekenen. In 't tocomende jaer des ghelijcks wederkeert, wy abt ten eersten uuten sesse ambachten sesse, ende wy busscop uuten sesse anderen ambachten sullenter kiesen sesse, ende also van dan vorts in allen tocomenden jaren. Ende des ghelijcks die leechluyde derselver stadt, allen jare, ten voerseiden dage in eynigher plaetsen ter selver stadt vergadert te samen, sullen noemen ende kiesen onder hon ‧viij‧ wyse mannen by der meester accoerde ende gevolge, die in 't tocomende jaer ghesworen raetsluyden voer leechluyde sullen ghehalden werden, onder al sulcke forme dat ter stont dese electie ende koer ghedaen sijn de die voerseide ‧viij‧ ghesworen raetsluyde uuten leechluyden byeen comende op den selven dach onder hon ofte in anderen leeehluyden eenen Meester kiesen, die yu 't ghemeyn, na der conynclyker stadt ende des hoefts-stoels van Aken, Borgmeester heyten sal, by des meeste deels der ‧viij‧ raetsluyden voerseit stemmen ende consente sal werden gecoren. Ghelijckerwijs oeck die voernoemde raetsluyde der ‧xij‧ ambachten ten voerseiden dage onder hon oft in anderen personen der ambachten eenen der gheliker borgermeester hy den meesten gevolghe ende accoerde der ‧xij‧ raetsluyde sullen noemen ende kiesen.
| |
| |
| |
§. 33. Tenor des eeds det borgemeesteren ende raetsluyden.
Welke borgemeesteren ende ghesworen raetsluyde uuten leechluyden ende ambachtsluyden, bynnen ‧iii‧ dagen nae hon electie, sullen doen voer onse scoutiten eenen solempnen ende hoechelijcken eedt dat dy officien, die hon bevolen sijn, ghetruwelijck ende in der bester voeghen ende manyeren doen sullen, ende oeck die rechten, privilegien, vriheiden ende loffelijcke ghewoenten, soe ons busscops ende abs, als der stadt ende inwoenders, sullen sorchvoldelijck promoveren, ende besorgen dat den ermen als den ryken ghelijckelijck ghesciede vervullinghe van justicien ende rechten, ende dat sy tegen onse jurisdictien, dominien, oft rechten nyet attempteren noch begynnen en sullen, oft yets wat van onsen rechten, jurisdictien ende dominien yet usurperen oft ombehoerlijck te onrechte doen en sullen, in geenre manieren; ende eest dat onse scoutiten aldusdanyge eeden bennen dry dagen weygheren te ontfanghen, die voerghenoemde borgemeesteren ende raetsluyde sullen dan alsulcken eedt van truwen doen voer die borgemeesteren ende raetsluyde des jaers voerleden, nae dat dese dry daghe oeverghepasseert sijn, welke alde borgemeesteren allen jare sullen ghebruken honre officien so langhe tot dat die nuwe ghecoren honnen eedt van trouwen ghedaen hebben; alsulcke condicien toeghedaen, eest dat, in desen borghemeesteren te kiesen, gheviel eenyghe tweedracht, soe dat meeste deel der leechluyde oft der ambachtsluyde in den voerseiden koer nyet en ware eendrachtich, ende dat soe vele stemmen waren in d'een syde als in d'ander syde, dese voer- | |
| |
genoemde aldus tweedrachtich sijnde honnen ghecoren borgemeesteren by tweedrachte sullen sy bennen dry daghen, te weten: d'een jaer den scoutet ons busscops ende ten anderen jare den scoutet ons abts, alle jare, soe decke als dat gheboert, presenteeren; welcke scoutet eenen van den tween voerseit hem gepresenteert sal ende moet kiesen in eenen borghemeester.
| |
§. 34. Wat scepenen ende raetsluyden by hon selven moghen doen.
Die scepenen der stadt sullen hy hon alleene tracteren, bekennen ende vonnyssen van den gherichtelijcken saken ende anderen dynghen, dy tot officien des scepen-stoels toe hoeren; ende die borgemeesteren ende raetsluyde by hen selven, sonder scoutet oft scepenen, sullen tracteren ende ordineeren die saken der voerseider stadt toebehorende, ende sullen macht hebben te ghebieden, te vergheren, uut te gheven ende te deylen die renten, proventen, pensien ende andere lasten der selver stadt, op sulcke voerwerde dat dy by hon geordineert werden, sullen alle jare moeten doen goede ende wettelijcke rekenscap van allen den geenen, dat sy ontfangen ende uutgegeven hebben, van der officien, dy sy ghehalden hebben, in wat manyeren dattet is, ende dat sullen sy doen in een seker plaetse, die daer toe specialijck geordineert is, ende dat openbaerlijck met openen doeren, ende dat in tegenwoerdicheit alre personen van der stat, so van wat conditien oft officien sy waren, die in deser rekenscap willen oft believet by te wesen, ende dat sonder yemants verbieden, welke rekenscap oeck die nuwe borgemeesters ende raetsluyde dien dat aengaet sullen
| |
| |
bennen eenre maent daer nae examineren ende mogen die waerheit ondersueken na dat hon dat goet duncken sal ende noet te syne.
| |
§. 35. Wanneer die raetsluyde metter scepenen sullen vergaderen.
Niet te min in anderen saken, die ons ende die voerseider stadt aengaen yn 't ghemeyn oft bysondert, sullen die voerseide borgemeesteren ende raetsluyde t' samen byeen vergaderen metten scepenen om te tracteren ende honne expeditien volmaectelijck oft perfectelijck te doen.
| |
§. 36. Wanneer men mach te samen te roepen die alde borghemeesteren ende raetsluyden.
Ende eest dat sy in honnen noetsaken te tracteren behoeven meerderen raet, so willen wy dat hon gheoerloeft sal sijn dy borgemeesteren ende raetsluyde van den jare voerleden by hon te ghebieden ende te roepen.
| |
§. 37. Wy hon sal betamen dy ghemeynte byeen te roepen nae dat versuek van den scoutiten.
Eest dat nae alsulcke convocatie die sake ende tydinghe schene soe groet ende hoeghe te syne dat sy dat, sonder weten ende raet van der gheheelre stadt, nyet en dorsten disponeren oft eyden; eest dat die voerseide borghemeesteren t' samen
| |
| |
metten personen der voerseider twee deelen daer teghenwoerdich met eendrachtighen ghevolghe concoort sijn, sullen sculdich sijn onse scoutiten te versueken dat sy mogen die gemeynte tegen des anderen daechs na den versueke van alsulker saken den voerseiden scoutiten op te doene ende mogen vergaderen. Dat welke onse scoutiten hon nyet weygheren en sullen; ende en wouden sy des nyet doen oft wolden hen uutter stadt stellen om dat versueck oft te beletten, so willen wy ende consenteren dat, den tweeden dach voirleden sijnde, die voerseide borgemeesteren soe verre als sy willen procederen op dat gemeyne gevolge voerseit, so mogen sy sonder eynyge calangie die ghemeynte hy eenen bode der stadt daertoe gheordineert sijnde, sonder die clocke te luyden, doen byeen roepen om wettelijck ende redelijck te tracteren die sake oft dat casus oft gheval daer om dat ghemeyn volck byeen gheroepen es.
| |
§. 38. Wanneer 't hom gheoerloft is ter stont die ghemeynte byeen te roepen.
Maer eest dat by onversiender gevalle ende een overhaestige noetsake overquame, dy ons oft dat lant oft dy voerseide stadt in eenygher manyeren tangeerde; ghelykerwijs, waert dat die selve stadt van den vyanden worde aenghevochten, oft een borgher by den vyanden worde ghevanghen ewech gheleyt, oft eynighe geval diergelijcker noetsaken overquame, ende onse scoutiten hierop by dy borgemeesteren ende raet versocht worden, ende nyet en wouden die clocke luyden om dat volck te vergaren totten wapen om te weren ende wederstaen, soe willen wy dat die voerseide borghemeesteren ende raet die
| |
| |
groete ban-clocke oft storme vrylijck in alsulken ghevalle moghen doen luyden oft slaen om dat volck voerseit met honnen wapenen te vergaderen.
| |
§. 39. Hoe men die statuten, koeren ghenoemt, maken sal.
Hier in boeven opdat die saken der stadt voerseit in gheender manyeren vergheten en werden, soe willen wy ende ordineren dat alle maendage die voerseide borgemeesteren ende raetsluyden metten voerseiden scepenen t'samen ende onversceyden, overmyts dat gheluyt der raetsclocken, sullen vergaderen in een seeker plaetse, ende daer ordineren ende statuten (die men ghewoenlijck is te heyten koeren) te maken, ghelijck dat den meesten ghevolch der borgemeesteren, scepenen ende raetsluyden, daer tegenwoirdich wesende, goet duncken sal, ende die selve te veranderen ende te besetten, ende die inghesal sijn te modereren, welcke insettinge, koeren, modereringe ende statuten, alsoe voerseit is, overmyts een eendrachtich ghevolch der meester partien ghemaect ende inghesat, sullen presenteren in scrifte onsen scoutiten, die welcke scoutiten, overmyts dat gheluyt der banclocken ofte storme, t'samen metten scepenen ende raetsluyden, nae inhout der previlegien der stadt voerseit, sullen doen publiceren ende ghebieden dat alsulcke statuten oft koeren, op die pene daertoe gheordineert ende ghewoenlijck, sullen werden ghehalden onghequetst.
| |
| |
| |
§. 40. Hoe men die vereenynghe, die men verdraghen is noemende, maken sal.
Noch willen wy ende 't es t'onser intentien dat die verenynghe, die men verdraghen is noemende, sullen ghescien, overmyts eendrachticheit ende gevolch der personen van beyde der partien, daer teghenwoerdich wesende, ende dat anders sonder der tweer partyen expres consent nyet ghescien en mogen in geender manyeren.
| |
§. 41. Van den guytschelden.
Niet te men so willen wy openbaerlijck dat egheen mesdadich, overmyts aldusdanyghe personen, van den excesse oft van der mysdaet hem mesbruyct, ghequyteert en mach werden, dan overmyts een eendrachtich ghevolch ende consent allen den persoonen ende elck besondere, daer present wesende, openlijck voerganck hebbe, ende dat te voeren der partyen der welcker mysdaen is, nae die groetheit ende swaerheit der mysdaet, overmyts dat ordeel ende decreet der gheerne, welcken die quytscellinghe der mysdaet toebehoert oft toebehoeren sal, te voeren ghenoch-gedaen sijn.
| |
§. 42. Een conditie op die voerseide puncten van koeren, verdragen ende quytscelden.
Alsulcke conditie den voerseiden toeghedaen, waer 't sake dat woertaen in die voerseide ordineringhe oft statuten,
| |
| |
koeren ghenoemt, oft in die vereenynghe, verdragen gheheiten, oft oeck in die quytscellinghe des voerseiden excess tracterende oft ordinerende, bevonden werde eenyghe der voerseider personen, oft scoutet, oft scepene, oft eenyghen anderen (dwelck anders sy) mysdadich oft mede-wetende der mysdaet oft mededeelachtich, oft den mysdadighen in sijn mysdaet sterckende, soe sal hy ter stont (hem verclaert sijnde sijn opinie) van woerde te woerde van aldusdanyghen raet sonder swaerheit afscheiden, alsoe lange als van dyer mysdaet daer hy mysdadich in was oft partye maecte, oft den mysdadyghen sterckende, overmyds andere personen daer present wesende, gheconcordeert ware ende gheheelijck ghetermineert.
| |
§. 43. Van der pandinghe der boden.
Woertaen op dat die voerseide borghemeesters ende raetsluyden ende die rentmeesteren der selver stadt te beter die sculdenaers van haren goeden moghen, in toecomenden tyden, bedwinghen tot een volcomen ghenoch-doen, willen wy ende onsen boden oft dienaers der voerseider plaetsen present sijnde, ende den toecomenden strenghelijck ghebieden ende bewelen dat sy bennen acht daghen, nae dat sy doer die voerseide borghemeesters, oft raetsluyden, oft rentmeesters der selver stadt wel versocht sijn, allen ende besonder aldusdanyghe sculdenaers der gueden doer pandynghe der panden, der ghereeder gueden oft doer commer ende behaldinghe der lichamen, oft anderssins soe 't alderbest past, sonder eenyghe excusatie, tot een volcomen ghenoch-doen, sullen gheheelijck dwinghen ende compelleren. Gheen profijt van der selver stadt daer van te
| |
| |
begheeren, maer sy moeghen ende sullen van den voerseyden sculdenaren honnen redelijcken loon hier van eyschen.
| |
§. 44. Oft die boden vergeetelijck waren te panden.
Ende eest dat sake dat die voerseide boeden aldusdanyghe executien weygheren te doen, oft dat sy van dy te doen rebel oft onaxsaem zijn, so sal men dese voerseide executien doen doen doer haer dieners, die daer toe ghedeputeert oft geordineert sullen worden als den termijn voerleden sal sijn van die voerseider acht dagen, totter tijt toe dat die voerseide dienaren oft onse boden aldusdanighen executien wael (als voerseit is) sullen wederomme aennemen.
| |
§. 45. Van der bewaringhe der graven.
Item wy willen, ende onsen voerseiden boeden, teghenwoerdich sijnde oft toecomende, sterckelijcken ghebieden ende beveelen wy, dat sy die graven, mueren ende wallen der voerseider stadt ernstelijck ende wel bewaren, alsoe 't honnen ambocht toebehoert ende in toecomende tyden sal toebehoeren, alsoe dat, overmyts haer versuymelijcheit oft gebreck, ons oft der voerseyder stadt gheen scade oft hynder af en come, ende oft sy daer in slap versuymelijck oft ghebreckelijck waren een tijt van acht dagen na dat sy van aldusdanygher ernstelijcker hoeden doer die voerseide borgemeesters oft raetsluyden sullen behoerlijcken verzocht sijn, van dier tijt voert sullen die voerseide borgemeesters ende raetsluyden doer hen zeker
| |
| |
boeden alsulcke mueren, graven ende vallen, nae manyere ende forme als voer, ernstelijcken doen bewaren, ter tijt toe dat die selve onse dienaers ende boeden alsulcken officie wederomme aennemen.
| |
§. 46. Van der ontfanckenyssen totter vryheit oft burgerscap.
Sullen oeck die voerseide scoutiten, scepenen, borgemeesteren ende raetsluyden t' zamen sijnde moeghen wremden, nochtans eersamen mannen van goeden name ende fame, in honre ende der voerseider stadt borghers ontfanghen, ende die vryheit ende poerterscap, soe dicwyl ende soe wanneer dat bequaem sal sijn ende hon dienlijck redelijcken sal duncken, gheven in deser manieren: dat sy van eenen yegelijcken wremden, die alsoe ontfanghen wort, drye alde conynclijcke goude gulden (te weten, eenen voer die scoutiten ende scepenen, den tweeden voer borgemeesteren ende raetsluyden, ende den deerden totter mueren ende vallen onderholdinghe) ontfanghen ende hehben sullen.
| |
§. 47. Van nye te ontfanghen eenyghen mysdadygen, ende van borghemeesteren ende raetsluyden.
Ende ten sal nyet gheoerloeft sijn den voerseiden scoutiten, scepenen, borgemeesteren ende raetsluyden in eenygher manyeren eenyghen van buten oft vremden man van eenygher leelijcker oft versmaedelijcke mysdaet in eenygher manyeren bescult, nae der stadt ghewoenten tot noch toe onderholden, in borgherscap voerseit toe te laten, ende bysonder gheenen
| |
| |
tot borghemeestersscap oft tot raetsman neemen oft kyesen, ten sy dat hy van der voerseider stadt gheboren sy oft eenychs borghers dochter oerspronkelijcken heeft ghetrouwet tot eene huysvrouwen.
| |
§. 48. Van der altheit ende renten der scepenen.
Daerom aenmerckende (ende te recht) dat mee (in) alden ende rypen dan in jonghen natuerlijcken sin ende onderscheit is, so willen wy ende ordineren dat voert aen nyemant in scepen der zelver stadt sal moegen werden ghekoeren ende aenghenomen ten sy dat hy ‧xxv‧ jaer alt sy, ende in sekeren renten ‧xx‧ mudde rogghen oft soe veel weerden in anderen renten hebbe, der welcker renten helfst te mynsten onder die wryheit der voerseder stadt geleghen sijn.
| |
§. 49. Van die residentie oft wonynghe der scepenen.
Ende elck der voerseider scepenen sal gheholden sijn in den voerseiden scepenstoel oft vryheit der voerseider stadt persoenlijck te resideren, ende oft hy des nyet en doet, ende een tijt van eenen halven jare absent ware, sal hy van dan voert beroeft sijn sijn scepens stoels, ende den selven scepen stoel sal ledich in den gheval ter dispositien oft in handen des oft der geenre tot wes oft welcker collatien heeft ghewoenlijcken gheweest te behoeren.
| |
| |
| |
§. 50. Van den gheenen die mysdoen in drye puncten.
Woertaen om boesheit ende quade wercken der gheenre, die liever tweedracht, twechtinghe ende kyvynghe dan vreede ende gherusticheit procureren ende arbeiden voerts te stellen, te bedwinghen, ende om sulcker quader stouheit te ghemoet te gaen, willen wy ende ghebieden ende, op die pene van ewelijcker uutghebannenheit, bevelen, dat nyemant van den borghers vernoemt doer voermeten cloecheit, in deser stadt oft vryheit der stadt, eenyghe banyer draghen, oft tot wapenen, oft alerm, oft clock, oft ban-scelle om dat volck te beroeren oft oploep te maken, nyet er presumere te luyden, buten weten, wille ende uutgesproken consent der voerseiden scoutiten, scepenen, borgemeesteren ende raetsluyden.
| |
§. 51. Van der penen die mysdoen in den drye puncten voerseit.
Ende oft yemant doer ingheven des duvels dede contrarie oft versumelijck ware in eenyghen puncten voerseit, die sal sijnre eeren onwederroepelijck ende ewelijk verbannen worden, soe verre als aldusdanyghe mysdaet by bequame ende warachtighe ghetuyghen wettelijck sy gheprueft, ende met sulcken verbannen des busdoms van Ludick en des greefscaps van Loon ende anderen plaetsen tot ons heren voerseit oft eenen van ons toebehorende met honnen aenhanghen ende toebehoeren, sonder wederroep in toecomende, ende sal
| |
| |
worden ende sijn ganselijck ende gheheelijk beroeft ende destitueert.
| |
§. 52. Van der correctien der gheenre die mysdoen in anderen puncten.
Maer eest sake dat in anderen ghevalle oft ordinantien voerseit, behalven in den dry puncten leest ghedeclareert, yemant gheviele ghebreckelijk te sijn oft daer teghen te doen, soe sullen die soe ghebreckelijck oft die ordinantien voerghenoemt brekende, nae honnen staet ende nae ghelegentheit ende groetheit des werks, nae ordeel ende decreet der gheenre, die in den raden verdraghen gheheiten worden, als voerseit is, overcomen, nae der manyeren als voer, redelijcken worden ghepijnt.
| |
§. 53. Dat men der jurisdictien nyet en sal af nemen.
Welke ordinantien, moderatien ende statuten by ons om vreede behoerlijcken ghemaect ende inghegaen, doer welke oft by welker cracht onse jurisdictien, vryheiden, wordeelen oft privelegien, ghewoenten ende heerscappie, en willen wy nyet dan alleen in ghevallen ende manyeren boven ghescreven eenych syns worden belet; maer gheheelijcken in honre cracht worden ghehalden, ende bevelen ende ghebieden onsen borghers voerghenoemt, tegenwoerdich oft toecomende sijnde, die truwelijcken te oefenen ende sonder teghendoen te onderhalden ende wastelijck te volbrynghen op peenen ende periculen boven gheseit.
| |
| |
| |
§. 54. Dat gheene dat gheattempteert is wedercome op synen alden staet.
Hier boven willen wy oeck ende consenteeren dat eest sake dat, by versuymenysse der oprechtinghen der ghemeynte, laest leden by den borgheren voerseit attempteert, eenyghen van den borghers voerseit by ons oft onser eenych oft by der stadt voerseit uut honnen goeden oft uut der stadt voerseit sijn gheworpen, dat dy by myddel der ordinantien voerseit tot honnen goeden ende totter vryheit der stadt voerseit vredelijck (als voer) worden toegelaten, ende des ghelijcken dat in onser oft eenyghe van ons schade oft prejudicie attempteert is gheheelijcken op synen alden staet bracht werde.
| |
§. 55. Van verbyntenysse der stadt.
Ende wy voergheseide scoutiten, scepenen, borgemeesteren ende ghesworen raetsluyden ende ander der stadt van Sint Truyden borgers ende inwoeners al t'samen ende een yeghelijcken besonder ordinantien, moderatien ende statuten voerseit, by onsen heren voerseit tot onsen ende andere goeder dorpen des bisdoms voernoemt stadighe supplicatie, ons uut specialijcker gratien goedertierlijk ghegeven oft verleent voer ons ende onse naecomelinghe ende erfghenamen teghenwoerdich ende toecomende sijnde, beloven te onderhalden ende te oeffenen alle ende elcken besonder in honnen particulen boven gheruert in goeden gheloeve, ende daer en boven ons ende onse erfgenamen ende naecomelinghen, onse
| |
| |
ende hon goede ghereet teghenwoerdich ende toecomende aen die voerseide onse heren ende alle een yeghelijcke dijt aengaet oft sal aengaen in eenygher manyeren in toecomende by tenoer deser onderpanden wy ende oeck vastelijck obligerent, vertyende met sekeren weten allen ende een yeghelijcken uutnemynghen, bescermenyssen, vryheiden ende loesheiden, die ons tegen dat voerseit is dienen ende onsen heren voerseit ontdienen mochten in eenygher manieren; willende oeck dat dese vertydinghe generael soe veel doen sal ghelijk oft sy alle ende elck besonder speciael by recht, wet oft ghewoonte dienlijk inghescreven ende ingesat waren.
| |
§. 56. Supplicatie gegeven den capittel ende den convent.
Ende op dat alle ende elck boven geseit van meerder macht sy, wy busscop voerseit onsen eerwerdigen capittel van Ludick, ende wy abt voernoemt onsen convent aendachtelijck ghebeden dat sy, al ende elck dat voerseit is, prysen, vestigen ende approberen willen ende oeck confirmeren, tot welcker beden wy deeken ende capittel van Ludick, soe werre in ons is ende dat ons toebehoert, wy oeck convent des cloesters van St. Truyden voerseit, alle ende elck bysonder, als orbaerlijck ende wel bedacht, loven, vestighen ende approberen, ende by desen brieve confirmeren.
| |
§. 57. Bezeeghelinghe der heeren der stadt, des capittels ende des convents.
In welker alre ghetuyghenyssen wy busscop ende abt verseit onse zeeghelen, wy oeck scoutiten, scepenen, borge- | |
| |
meesteren, raetsluyden ende borghers voerseit den zeeghel der selver stadt, wy oeck deeken ende capittel van Ludick den zeeghel onser kercken, ende wy convent onsen zeeghel in ghetuyghenysse der waerheit allen ende yeghelijcken het gheens dat voerseit is, hebben desen letteren aenghehanghen. Gegeven in 't jaer der gheborten Ons Heren dusent dry hondert sessensestich, den ‧xxv‧ dach augusti.
|
|
Auteursrechtvrij