Een geestelijck liedt-boecxken


Een nieuw Iaer Liedt, Op de voys: Dat viel een hemeld dauwe. Oft, De winter is ons verganghen. Oft, Wilhelmus van Nassouwen. Oft, O Godt al van der minnen. GHy Christenen uytvercooren, Wilt zijn sonder verdriet, En wilt hier vreught opbooren, Van datter is gheschiedt In Bethlehem ghepresen, Doort Sterre schijnsel clear, Alsoo wy moghen lesen Al in dit nieuwe Iaer. Tgheschiede in die daghen, In een duystere nacht, Dat die Herderkens saghen Gods heerlijckheyt en macht, De Enghelen die songhen, Gods glory schoon en clear, Die Herderkens ontspronghen Al in dit nieuwe Iaer. Glory al in den throone Songhen sy overluydt, Haer stem was alsoo schoone, Gaet (dit was haer besluyt) Te Bethlehem vercooren
[Folio K6v]
In Davids Stadt voorwaer, Daer is Christus ghebooren, Al in dit nieuwe Iaer. Een Ster werden vernomen In Orienten Landt, Coninghen zijn ghecomen Te brenghen Offerhandt, Al binnen derthien daghen Gout, Myrrhe, Wieroock eenpaer, Dat quamen sy hem draghen Al in dit nieuwe Iaer. Simeon oudt van jaren, Die was gheopenbaert, Hy soud van hier niet varen, Hem soud werden verclaert, Christus Gods Soon van wesen, Der Menschen Middelaer, Om ons hier te ghenesen, Al in dit nieuwe Iaer. Ons Prins die is besneden, Gheoffert nae de Wet, Dat wy van hert en leden, Zijn souden onbesmet, Dat wy nae sijn behaghen, Hier souden allegaer, Godt in ons herten draghen, Al in dit nieuwe Iaer.