Een geestelijck liedt-boecxken

inhoudende nieuwe Liedekens, nu anderwerf ghedruckt, verbetert ende vermeerdert met eenige nieuwe Leysenen, nae ghelegentheyt der Hooghtijden

Een Leysen

alst begint.
oft, Puer nobis nascitur.
Oft, Van den Haselaer boom.
oft, In Oostenrijck daer leyt een slot.
oft, O Heer wie sal.Psal.14.
oft, Dat Iaer is langer als den dagh.

WAer is de Dochter van Syon,
Van Godt reyn uytghelesen
De Bruygom schoonder als de Son
Die socht sijn Bruyt ghepresen.

In Nazareth vol suyverheyt,

So is een Maeght ghevonden,
De Vader van de triniteyt,
Heeft haer sijn Bood' ghesonden,

Ave gratia sprack hy soet,

De Maeght begon te schromen
Plena, Dominus tecum goet,
Heeft my tot u doen comen.

Des alderhooghstens cracht alleyn,

Suyvere maghet fijne,
Doet dat ghy sult ontfanghen reyn
Want die sal u omschijnen.

Ghy sult ontfanghen tot een loon

En eeuwigh Maghet blyven,
Een Kint dat wesen sal Gods Soon
Dat wonder sal bedrijven.

[fol. I8v]

 

Hy sal besitten 'terf-deel

 

Sijns Vaders hoogh verheven,

 

Hoort Dochter van Syon so eel,

 

waer sydy nu ghebleven.

 

 

 

De Prophecy die is vervult

 

Den tijdt die is ghecomen

 

Staet op Ierusalem ghy sult,

 

Sien wat hier wort vernomen.

 

 

 

Doe men al de weerelt beschreef

 

Doen gingh die Maghet sware

 

Te Bethlehem was dat sy bleef

 

Omt Kindeken te baren.

 

 

 

Snachts in der nacht, 'tscheen also clear

 

De Enghelen sie songhen,

 

Glory sy met een groote schaer

 

Die Herderkens ontspronghen.

 

 

 

Glory (songhen sy) in den throon,

 

Vrede sy op der Aerden

 

Dat licht was clear, 'tgeluyt was schoon

 

'Twas hen van grooter waerden.

 

 

 

Sy ginghen nae der Enghelen stem,

 

Dat Kindeken daer soecken

 

En vondent binnen Bethlehem

 

Ghewonden in de doecken.

 

 

 

By sijn Moeder seer wonderlijck,

 

Dat sijt al openbaerden

 

En die behoedet van ghelijck

 

Daer sijt al by verclaerden,

[fol. K1r]

 

Wat haer den Enghel hadt gheseydt,

 

Van haren Salighmaker,

 

Die daer in doecken was ghelydt,

 

Sult ghy niet wacker raken?

 

 

 

Soo veer uyt Orienten Landt

 

Drie Coninghen daer quamen,

 

Om 'tKindt te brenghen offerhandt,

 

Sal u dat niet beschamen?

 

 

 

De Stadt die is beroert gheweest,

 

Herodes was vol tooren,

 

Als sy daer vraeghden minst en meest

 

Waer is dat Kindt ghebooren?

 

 

 

De Priesters hebben doen de Wet

 

En Propheten ghelesen,

 

En haer de plaets ghenoemt oo net,

 

De wegh daer toe ghewesen.

 

 

 

Ierusalem, Syon gaet mee ⁺

 

In uwen schuer verlaten,

 

Meer ofte min ist sijn woon-stee,

 

Wilt ghy hem niet in laten?

 

 

 

Mijn Broeders Christen Catholijck

 

Laet ons mee inwaerts keeren,

 

Met herten reyn en suyverlijck,

 

Dat Kindeken oock eeren.

 

 

 

Prins en Princes valt hem te voet,

 

En wilt dit Kindt aenbeden,

 

Ghelijck die Coninghen soo vroet,

 

Met Gout, Myrh, Wieroocks deden.

+ Esa.60.