Een geestelijck liedt-boecxken

inhoudende nieuwe Liedekens, nu anderwerf ghedruckt, verbetert ende vermeerdert met eenige nieuwe Leysenen, nae ghelegentheyt der Hooghtijden

Een Geestelijck Liedt.

Op de voys: Cupido triumphant.

HOe quelt ons t'allen cant,
De eygen wil bedurven,
Dat doort eyghen verstandt,
Dat beter was ghesturven,
Dit is de grondt,
Daer van dat comt de zond,
Die soo veel zielen heeft ghewondt.

Wat branter in den Hel

(Dat is 'tgemeene vraghen)
Dan eyghen wils ghequel,
Een worm vol van cnaghen,
Die altijdt wroet,
Teghen dat hem ontmoet,
En niet weet dat hy't selven doet.

[fol. H6v]

 

Hier is gheen nutter deught,

 

Dan eyghen yet te laten,

 

Verlaet, u ziel verheught,

 

In blijtschap boven maten

 

Want so men seyt,

 

Dat eyghen yet verleyt

 

die yet, wil niet, is rust bereyd.

 

 

 

Gherustigh dat hy leeft,

 

Die eyghen wil can derven

 

Want hy een blijtschap heeft,

 

Int leven en int sterven

 

Ghelaten sijn,

 

Dat met een blijdt aenschijn

 

So sal hy Godt oock danckbaer sijn.

 

 

 

Wat hem van yemant schiet

 

Hy sal dat niemant claghen

 

Dan Godt, diet al aen-siet

 

Daer me hy 'tcan verdraghen,

 

Voorsichtigh, cleyn

 

Is sijn leven ghemeyn,

 

Sijns hertsen vreed' is Godt certeyn.

 

 

 

Die hier door eyghen wil

 

Yemant soeckt te regeeren,

 

Of heerscht met woorden stil,

 

En brant in sijn begheeren,

 

Wat baert sijn lust?

 

(Niet anders dan onrust)

 

In hem die nemmer wort gheblust.

 

 

 

Die hier sijn eyghen sin

 

(Door diep insicht wilt mercken)

 

Behoudet meer of min,

[fol. H7r]

 

Met cloeck verstants bewercken.

 

Wort dick ghequelt,

 

En in sijn hert ontstelt,

 

Om eer, of staet, of macht of ghelt.

 

 

 

Oorlof ghy Princen wijs,

 

Verstaet wel mijn vertellen

 

Neemt dit tot een advijs

 

En wacht u selfs te quellen

 

Den tijdt, subijt,

 

Verleden sy dy quijt,

 

begint, verwint u siel verblijt.