Geestelijcke harmonie

van veelderley ende uytghelesene soo oude als nieuwe Catholijcke Kerckelijcke Lofsanghen, Leysenen ende Liedekens, op die principaelste Feesten en getijden des Iaers, die men in’t Vorstendom Cleve by den Catechismus singht

LXXXIIII. Een seer oudt ghesangh van die H. Moeder Goodts.

Ick weet een Maget schoone,
Die draegt den hoochsten prijs,
Wie ringt nae haren loone,
Sy is by diensten wijs,
By haer sijn andere vrouwen,
Wy bloemekens aen der Ave,
Sy is een Lelijen rijs.

Die Maget heet Maria,

Sy is der gnaden vol,
Dat sy ons den Heere versoene,
Des is sy machtigh wol,
Des willen wy bidden alle,
Met een heyligen schalle,
Dat sy ons helpen wol.

Haer Ionckvrouwlijcke gebeelde

Haer kuysheyt is soo groot,
Dat sich een Eenhorn wilde,

[p. 120]

 

Begaf in haren schoot,

 

Die was soo sterck van kraften,

 

Wt meesterlijcken schaften,

 

Den Hemel hy opsloot.

 

Maria troosterinne

 

Des Heyligen Geestes schijn,

 

Nu bidt voor ons gemeyne,

 

Voor ons u kindeken,

 

Verwerf ons aflaet der sonden,

 

Al onse lieve vrienden,

 

Laet u bevoelen sijn.

 

Verleene ons lijfs sterckte,

 

Tytlijck in onseren noot,

 

Bewaert ons voor onser vyanden swert,

 

Beschermt ons lijf en goet,

 

Verleent ons genaedt en sterckte

 

In duegentlijcken wercken,

 

Soo werden wy wel verwaert.

 

Maria troosterinne,

 

Ghy roed van Iesse,

 

Als wy van hier sullen scheyden,

 

Met trouwe by ons stae

 

Den rechten wech ons wijse,

 

Den Hemelschen Paradijse,

 

O Mater gratie.