Flandrijs

(1998)–Anoniem Flandrijs– rechtenstatus


Fragment III
[Folio 5ra]
1258[regelnummer] Opten velde sijn gesceden Daerse god moete geleiden 1260[regelnummer] Ende tvelt bleef doncker doe Flandrijs bleef biddende emmer toe Over den doden ende over de gone Dies god begerde te vermone Toten dage hi niet cesseirde 1265[regelnummer] Op sijn ors hi doe monteirde Ende reet den wech emmer vort waert Int therte hi herde sere mesbaert Datti den doden niet vraechde das Of dat de wech te cuelne was 1270[regelnummer] Hi was dies al ombedocht In een foreest quam hi gerocht Tmeeste dat noit sine ogen sagen Dor bussce reet hi ende dor hagen Daer noit man cume hadde getreiden 1275[regelnummer] Voor i hol quam hi gereden Dat diepe inde erde stoet Het was wel wijt c voet Voren ende binnen herde ghehijnge Als flandrijs versach dese dingen 1280[regelnummer] Hilti voor dat hol sijn part Ende riep met luder stemme inwaert Ende sijn luut dies weider doonde Hi waende datter volc in woende Hadde flandrijs gewillen plegen 1285[regelnummer] Mijns raets hi hadde best geswegen Ende gereden siin pat Dan hi also riep int gat Want hijs hebben mach verdriet Uten hole hi sprijngen siet 1290[regelnummer] I dier van vreseliker manieren Sine lede waren gelijc den stiere Sine benen na den parde Snel alstie hert liept op darde Daer hooft ende hals souden standen 1295[regelnummer] Was i man met arme met handen Gewassen ende ru van hare In dietsce heet een sagittare Ende in griex i centauroen Fel ende wreet in al sijn doen 1300[regelnummer] Het was alf man alf beste Dese spranc uut met oreeste Den hole herde zere verstormt
[Folio 5rb]
Dat dier wonderlike gevormt Hadde anden hals enen witten scilt 1305[regelnummer] I boge het inde grepe hilt Daert altoes mede scoot Die het gerochte bleef doot Sine scichten waren gevenimeirt Voor flandrise heeftet hem gekeert 1310[regelnummer] Die wonder hadde van sire vorme Al sijn haer stont te storme Van fellen moede den sagittare In sinen boge sette hi dare I scicht scarp als een doren 1315[regelnummer] Flandrijs warp den scilt doe voren Dat was hem i bate groot Die scicht die de andre scoot Brac daerop als een biese Flandrijs die hem ducht van verliese 1320[regelnummer] Trac sijn goede swert al bare Ende reet jegen den sagittare Die emmer scoot ende achter vlo Flandrijs constem niet volgen so Die andre was hem alte snel 1325[regelnummer] X scichte die waren fel Scoot op flandrijs de sagittare Die braken al opten scilde clare Sine mochten vesten niet Flandrijs dat overcoene diet 1330[regelnummer] Sach des anders scichte al uut Doe reet hi anden fellen druut Alstiene gerne hadde geplaget Dus vliet de i ende dandre jaget Die centauroen was herde wreet 1335[regelnummer] Hi sach datti moet hebben leet Van flandrise of hem verwinnen Dies keerde hi hem met fellen sinnen Ende liep flandrise jegen de side Metten scilde dat sijn rosside 1340[regelnummer] Van pinen moesten vallen op die hamen Also de lijve quamen te samen De centauroen flandrise stac So dattie zadel stelle brac Ende hi wel na ter herde quam 1345[regelnummer] Flandrijs sloech alstie was gram Den centauroen den sagittare Met sinen goeden swerde dare
[Folio 5va]
Int hooft ene wonde groet Mettien tros rosseel op scoot 1350[regelnummer] Met sinen here den stouten deigen Die sagittare quam hem recht jegen Die hem ontsach van flandrijs zwerde Ende hadde getrect uter herde I jonge heke met sire cracht 1355[regelnummer] Noit man hadde soe grote macht Inne alstie centauroen Op flandrise ghijnc hi hem doen Die jegen hem ooc was gevee Den scilt die wit was als een snee 1360[regelnummer] Gemaect van enen elpen bene Hilti als die strijts gemene Beghert te sine de centauroen Slouch op flandrise den baroen Opten helm metter poten 1365[regelnummer] Dat flandrijs ors quam gescoten Van groter pine optie erde Ende flandrise soe sere derde Dattine hoorde no ne sach Echter soudi enen slach 1370[regelnummer] Op flandrise hebben ghesleigen Maer flandrijs de coene deighen Bequam ende nam den brant Daer meide slouchi den viant Als diene waende cloven dure 1375[regelnummer] Thooft maer ter sconferture Warp de centauroen den scilt daer jegen Daer een quartier of heeft geslegen Flandrijs metten swerde van stale Dat neider vel in groene dale 1380[regelnummer] Doe hief de heke de sagittare Ende sloech op flandrise den riddare Enen vreseliken slach Het ware flandrijs sterfdach Hadde hine metter poten gerocht 1385[regelnummer] Maer hi was dies wel bedocht Datti ontkeerde metten parde Entie heke viel in darde Voets diepe metter druust Flandrijs die tswert hilt inde vust 1390[regelnummer] Liet tors lopen ten sagittare Die soe sere waert in vare Datti te vliene heeft gere Ende liet de heke entie were
[Folio 5vb]
Als die flandrijs swert ontsiet 1395[regelnummer] Maer flandrijs dat coene diet Gerochte den anderen so Eer datti iet verre ontvlo Datti hem den scilt dor slouch Ende dedem sulc ongevoech 1400[regelnummer] Dattine wondde inde porsse Ende redene neder metten orse Rossele dattie centauroen Van grooter smerte en weet wat doen Ende lach metten benen op waert 1405[regelnummer] Flandrijs verdrouch sijn goede swaert Ende soude slaen den sagittare Die sire gramscap waert geware Ende leide de armen bede te samen Ende uut sinen ogen quamen 1410[regelnummer] Grote tranen ongetelt Dit sach flandrijs die stille helt Tswert ende penst dat dander wille Genaden die daer lach al stille Bider maniere die hi togede 1415[regelnummer] Flandrijs der ghenaden poghede Ende deidem op staen vander heide Ic doe di genaden vrient hi seide Wiltu mi te dienste staen Waer ic riden sal ofte gaen 1420[regelnummer] Gelike enen cnape doet sinen here Die centauroen trappelde sere Ende toochde blijscap metten anscine Flandrijs woort enie tale sine Verstont hi wel watsi bescieden 1425[regelnummer] Maer gene andworde consti bedieden Dus sijn de ii gevriende bleven Die sagittare moeste beiven Vander smerte van sinen wonden Flandrijs nam ten selven stonden 1430[regelnummer] Sinen steen ende seinder mede Den sagittare sine wonden beide In de side ende sijn hovet Ende si genasen des gelovet Ende loken daer flandrijs toe sach 1435[regelnummer] De sagittare alsi eerst mach Viel voer flandrise optie erde Ende meenden van sire werde Te danckene die hi them waert wrochte Ende flandrijs hem doe bedochte 1440[regelnummer] Van sinen lieve aquiline

Vorige Volgende

Fragment III