Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat v. Capittel.

1. Uan de vruchten des gheloofs, 6. het officie Iesu Christi.

A.1

SO ^a wie ghelooft dat Iesus is ^b Christus, die is wt God gheboren: Ende so wie lief heeft den ghenen die ghebaert heeft, die heeft oock lief den ghenen die wt hem gheboren is.

a Ioannis 1.b.12

b Dat is, de Gesalfde

[fol. 90r]

2

Hier in bekennen wy dat wy de kinderen Gods lief hebben, als wy God lief hebben, ende syne gheboden houden.

3

^c Want dit is de liefde Gods, dat wy syne gheboden houden: ^d ende syne geboden en zijn niet swaer.

c Ioannis 14.b.15 ende 15.b.10

d Matthei 11.d.30

4

Want al wat wt God gheboren is, ouerwint de werelt: ^e ende dit is onse ouerwinninghe die de werelt ouerwint, [namelick,] ons ghelooue.

e Ioannis 16.d.33

5

^f Wie ist die de werelt ouerwint, anders dan die ghelooft dat Iesus is de Sone Gods?

f 1.Corint. 15.f.57

6

Dese ist die daer koemt door water ende bloet, [namelick,] Iesus Christus: niet door water alleenlick, maer door water ende bloet: ^g Ende de Gheest ist die ghetuyghenisse gheeft, dat de Gheest de waerheyt is,

g Matthei 3.b.16 Ioannis 1.d.32

7

Want dry zijnder die ghetuygenisse gheuen ^h† inden Hemel, de Vader, het Woort, ende de heylighe Gheest, ende die dry zijn een.

h† Anders, de Gheest, het Water, ende het Bloet, dese dry zijn een.

8

Ende dry zijnder die ghetuyghenisse gheuen op der Aerden: de Gheest, ende het water, ende het bloet: ende die dry zijn tot eenen.

9

ⁱ Ist dat wy het ghetuyghenisse der menschen aen nemen, het ghetuyghenisse Gods is meerder: want dit is het ghetuygenisse Gods dat hy betuycht heeft van synen Sone.

i Ioannis 5.d.36

B.10

^k Wie den Sone Gods ghelooft, die heeft dit ghetuyghenisse in hemseluen: wie God niet en ghelooft, die heeft hem leughenachtich ghemaeckt, want hy en heeft het ghetuyghenisse niet ghelooft, dat God van synen Sone betuycht heeft.

k Ioannis 3.d.36 Roman. 8.b.15.16 Galat. 4.a.6

11

Ende dit is dat ghetuyghenisse, [namelick,] dat God ons het eewighe leuen ghegheuen heeft, ^l ende dit leuen is in synen Sone.

l Ioannis 1.a.4

12

Wie den Sone heeft, die heeft het leuen: wie den Sone niet en heeft, die en heeft het leuen niet.

13

Dit hebbe ick v geschreuen, die ghy ghelooft inden naem des Soons Gods, om dat ghy soudt weten dat ghy het eewighe leuen hebt, ende om dat ghy soudt gheloouen inden naem des Soons Gods.

14

Ende dit is het vertrouwen dat wy by God hebben: ^m ist dat wy wat bidden na synen wille, dat hy ons verhoort.

m Ierem. 29.b.12 Matthei 7.a.8 ende 21.c.22 Marci 11.c.24 Luce 11.a.9 Ioannis 14.b.13 ende 15.a.7 ende 16.b.14 Iacobi 1.a.6 1.Ioannis 3.c.22

15

Ende ist dat wy weten dat hy ons verhoort, wat wy bidden, so weten wy dat wy de beden hebben die wy van hem ghebeden hebben.

19[16]

Ist dat yemant siet synen broeder sondighen een sonde niet totter doot, die sal bidden,, ende hy sal hem het leuen gheuen: den ghenen [segghe ick,] die niet en sondighen totter doot. ⁿ Daer is sonde totter doot, Ick en segghe van die niet, dat du bidden salt.

n Numeri 15.d.30 1.Sam. 2.c.25 Ieremie 7.b.15 ende 21.b.14 ende 14.b.11 Matthei 12.e.45 Marci 3.d.38 Luce 12.b.10 Hebr. 6.a.4 ende 10.c.26 2.Petri 2.c.20

17

^o Alle ongherechticheyt is sonde, maer is sonde niet totter doot.

o 1.Ioannis 3.a.4

18

Wy weten dat ^p so wie wt God gheboren is, die en sondicht niet: maer die wt God gheboren is, bewaert hemseluen, ende de Boose en ghenaeckt hem niet.

p 1.Ioannis 3.a.9

19

Wy weten dat wy wt God zijn, ende de werelt is gheheel in het boose gheleghen.

C.20

Maer wy weten dat de Sone Gods is ghekomen, ^q ende heeft ons den sin ghegheuen, dat wy hem kennen die warachtich is, ende zijn inden warachtighen, [namelick,] in synen Sone Iesu Christo. ^r Dese is de warachtighe God, ende het eewighe leuen.

q Luce 24.e.45

r Esaie 9.a.6 ende 44.a.6 ende 34.a.5

21

Kinderkens, bewaert v seluen van de Afgoden. Amen.