Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat vi. Capittel.

1. Hy achteruolcht die straffinghe, ende vermaent hen dat sy toenemen.

A.1

DAerom de reden die het beginsel gheeft in Christo achterlatende, laet ons na de volkomenheyt voortgaen, niet wederom legghende den gront des berous van dootlicke wercken, ende des gheloofs in God.

2

Der leeringhe der doopen, oplegghinghe der handen, ende opstandinge der dooden, ende eeuwighen oordeels.

3

Ende ^a dit sullen wy doen ^b ist dat het God toelaet.

a Uerstaet, tot de volkomentheydt voortuaren

b Actuum 18.c.21 1.Corint. 4.b.19 Iacobi 4.b.15

4

^c Want het is onmoghelick dat de ghene die eens verlicht gheweest zijn, ende de Hemelsche gaue ghesmaeckt hebben, ende des heylighen Gheests deelachtich gheweest zijn,

c Matthei 12.e.45 Heb. 10.c.26. 2.Petri 2.c.20

5

Ende ghesmaeckt hebben het goede woordt Gods, ende de krachten der toecomender wereldt:

6

Ende afuallich worden, dat sy wederom vernieut worden tot bekeeringhe, als die den Sone Gods [voor] henseluen wederom cruycighen ende tot schande maken.

7

Want de Aerde die den regen die op haer menichmael koemt, indrinckende, bequaem kruyt ^d voortbrengt den ghenen daer sy van geoeffent wort, die ontfangt segheninghe van Gode,

d Griecx, baert

8

Maer die doornen ende distelen voortbrengt, die is verworpelick ende na by der veruloeckinghe, wiens eynde is ^e om te verbranden.

e Griecx, tot verbrandinghe.

9

Maer wy betrouwen van v lieue, dat beter is, ende ter salicheyt aenkleeft, hoewel wy also spreken.

B.10

^f Want God is niet onrechtueerdich dat hy uwe werck soude vergheten, ende den arbeyt der liefden die ghy aen synen naem bewesen hebt, die ghy den Heylighen gedient hebt, ende oock dient.

f Matth. 10.e.42 ende 25.e.40 Marci 9.e.41 Ioannis 13.c.20 Prouer. 14.d.31

11

Maer wy begheeren dat een yeghelick van v de selue neersticheyt bewijse, tot een seker betrouwen der hope, totten eynde:

12

Op dat ghy niet traghe en wort, maer nauolghers der ghenen die door ghelooue ende lanckmoedicheyt de beloften beeruen.

13

Want doe God Abraham beloefde, dewijle hy gheenen meerderen hadde om by te sweeren, swoer hy by hemseluen,

14

Seggende: ^g Warachtelick ick sal dy ^h met segheninge seghenen, ende met vermenichfuldinghe sal ick dy vermenichfuldighen.

g Gene. 12.a.3 ende 17.a.4 ende 22.b.16 Psalm. 105.a.9 Luce 1.h.72

h Griecx, segenende seghenen, ende vermenichfuldigende vermenichfuldighen.

15

Ende also als hy lanckmoedichlick verwacht hadde, heeft hy de belofte verkreghen.

16

Want de menschen sweeren by hem die meerder is, ⁱ ende de eedt tot versterckinge [gedaen, is] hen het eynde alder teghensprekinghe.

i Exodi 22.b.11

17

Waer in als God wilde den erfgenamen der beloften oueruloedelick bewijsen de ^k onueranderlickheyt zijns raets, so settede hy [synen] eedt daer tusschen:

k Griecx, onuersettelickheyt

18

Om dat wy door twee onueranderlicke dingen, in de welcke het onmoghelick is dat God liegen soude, stercken troost hebben souden, [wy] die [hier] toeulucht ghenomen hebben om de voorghestelde hope vast te houden:

19

De welcke wy hebben als eenen ancker der zielen, die seker ende vast is, ende ingaet tot in het ghene dat binnen den voorhanck is:

20

Daer de voorlooper Iesus voor ons is inghegaen, na de ordeninge Melchisedech ^l Hooghepriester gheworden inder eeuwicheyt.

l Hebr. 3.a.1 ende 4.b.14 ende 8.a.1 ende 9.b.11