Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iiij. Capittel.

1. Ongheloouicheyt verhindert de salicheyt der menschen, 3. want de warachtighe ruste is beloeft den ghenen die gheloouen in Iesu Christo, 14 wiens offerhande maeckt alle de ceremonien Mosis te niete.

A.1

LAet ons dan vreesen, dat niet yemandt van ^a v, de belofte van in zijn ruste te komen verlatende, schijne ^b verhindert te syne.

a Griecx, ons

b Of, bedroghen

2

Want het is ons verkondicht, ghelijck oock hen: maer het woort ^c der predikinghe halp hen niet, ^d† dewijle het met den ghelooue niet vermengt en was in de ghene die het hoorden.

c Griecx, des gehoors

d† Anders, die in het ghelooue niet vermengt en waren met de ghene die het hoorden.

3

Want wy die gheloouen, komen in de ruste, ghelijck hy ghesproken heeft: ^e Also dat ick gesworen hebbe in mynen toorn: Sy sullen in myne ruste niet komen, hoewel de wercken vanden beginne der werelt aen volmaeckt zijnde.

e Psalm. 95.b.11

4

Want hy heeft te eenigher plaetsen van den seuensten [dach] aldus gesproken: ^f Ende God heeft gherust in den seuensten dach van alle syne wercken

f Genes. 2.a.2 Exodi 20.b.11 ende 31.b.17 Deuter. 5.b.14

5

Ende wederom hier in: Sy sullen in mijn ruste niet komen.

6

Dewijle dan dit blijft, dat sommighe daer in komen: ende dien het eerst verkondicht was, daer niet inghekomen en zijn om der ^g ongeloouicheyt wille.

g Of, onghehoorsaemheydt, of, onghesegghelicheyt etcet.

7

So bescheydt hy wederom eenen dach, heden, segghende door Dauid na soo veel tijdts, ghelijck geseyt is: ^h Heden isset dat ghy zijn stemme hoort, so verhardt uwe herten niet.

h Psalm. 95.a.7 Hebre. 3.a.7

8

Want haddese ⁱ Iesus in de ruste ghebracht, so soude hy daer na van gheenen anderen dach gesproken hebben.

i Dat is, Iosue

9

So blijft dan een ruste den volcke Gods.

B.10

Want die in zijn ruste ghegaen is, heeft selue van syne wercken gherust, ghelijck God van de syne.

11

Laet ons dan neerstich wesen om in dese ruste te komen, op dat niemandt in het selue exempel der ^k ongheloouicheyt en valle.

k Of, onghehoorsaemheydt

12

Want het woort Gods is leuendich ende krachtich, ende scherper dan ^l eenich tweesnijdende sweert, ^* ende gaet door tot de verscheydinghe der zielen, ende oock des gheests, zenuwen ende ^m leden: ende is een ⁿ onderscheyder der gedachten ende meyninghen des herten.

l Esaie 49.a.2 Ephes. 6.b.7

* Eccle. 12.b.11

m Of, merch:

n Of, oordeelder

13

^o Ende daer is gheen creatuere voor hem onsienlick: maer alle dinck is naeckt ende ontdeckt voor syne oogen, ^p met den welcken wy te doen hebben.

o Psalm. 33.b.13 Syrach 15.c.20 ende 23.c.28

p Of, tot den welcken wy spreken

14

Dewijle wy ^q dan eenen grooten Ouerpriester hebben, Iesum den Sone Gods, die door de Hemelen ingegaen is, laet ons dese belijdinghe vast houden.

q Hebr. 13.a.1 ende 6.c.20 ende 8.a.1 ende 9.b.11

15

^r Want wy hebben gheenen Ouerpriester die niet en soude konnen medelijden hebben met onse krancheden: ^s maer die in alle dinghen na gelijckheyt heeft versocht gheweest ^t sonder sonde.

r Heb. 2.b.18

s Phil. 2.a.7

t Esaie 53.a.9 2.Corint. 5.c.21 1.Petri 2.c.22 1.Ioannis 3.a.5

16

Daerom laet ons toe gaen met vrijmoedicheyt, ^u tot den throon syner ghenade: op dat wy barmherticheyt ghekrijghen, ende ghenade vinden in den bequamen tijt der hulpe.

u Roman. 3.c.25