Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

DE SENDBRIEF Pauli tot de Galaten.

Dat Eerste Capittel.

6. Paulus straft de onghestadicheyt ende lichtueerdicheyt der Galaten, 7. de welcke verleydt waren door de valsche Apostelen, de welcke predickten dat de onderhoudinghen der Ceremonien des Wets, noodich waren ter salicheyt.

A.1

PAulus een Apostel, ⁺ niet van menschen, noch door menschen: ^a maer door Iesum Christum, ende God den Vader, die hem wt den dooden verweckt heeft:

+ Paulus van Gode gesonden om te prediken.

a Titi 1.a.3.

2

Ende alle de broeders die met my zijn, den Ghemeynten in Galatia:

3

^b Ghenade zy v, ende vrede van Gode den Vader, ende onsen Heere Iesu Christo,

b Roman. 1.a.7 1.Corinth. 1.a.2 Ephes. 1.a.1 1.Petri 1.a.2

4

^c Die hemseluen ghegheuen heeft voor onse sonden, om ons te verlossen wt dese tegenwoordighe boose werelt, na den wille onses Gods ende Vaders,

c Matth. 20.c.28 Galat. 2.c.20. Ephes. 5.a.2 Titi 2.b.14 Hebr. 9.b.14

5

Den welcken zy prijs, van eewicheyt tot eewicheyt. Amen.

6

My verwondert dat ghy so haestelick ^d verlatende hem, die v in de ghenade Christi gheroepen heeft, ouerghebracht wort, tot een ander Euangelium.

d Oft, Christum die v in genaden gheroepen heeft, verlatende,

7

Daer doch anders gheen en is: ten zy datter sommighe zijn ^e die v beroeren, ende willen het Euangelium Christi verkeeren.

e Actuum 15.a.1

8

^f Maer al waert oock, dat wy, of een Enghel wt den Hemel, v anders predicten ^g dan dat wy v ghepredickt hebben, die zy veruloeckt.

f 2.Corinth. 11.a.4

g Of, bouen dat

9

Ghelijck wy te voren gheseyt hebben, also segghe ick oock nu wederom: Ist dat v yemant predickt, anders dan ghy ontfanghen hebt, die zy veruloeckt.

B.10

Want ^h predike ick nu menschen, of God? ⁱ Of soecke ick menschen te behaghen? ^k Want hadde ick menschen behaecht, so en ware ick doch gheen Dienaer Christi.

h Griecx, rade

i 1.Thess. 2.a.4

k Ioannis 13.b.19 Iacobi 4.a.4

11

^l Ick late v weten broeders, dat het Euangelium dat door my ghepredickt is, niet na den mensche en is.

l 1.Corinth. 15.a.1

12

^m Want ick en hebbe het niet vanden mensche ontfanghen noch gheleert: maer door de openbaringhe Iesu Christi.

m Ephes. 3.a.3

13

ⁿ Want ghy hebt mijn wandelinge ghehoort die voortijden in het Iodendom was, dat ick de Ghemeynte Gods bouen maten seer veruolchde ende verwoestede.

n Actuum 8.a.3 ende 9.a.1 ende 22.a.4 ende 26.a.9 Philippen. 3.a.6 1.Timoth. 1.b.13

14

Ende ick ghinck voort in het Ioodtschap, bouen vele ^o mijns ghelijcke in mijn gheslachte: de wijle ick seer vyerich was in de leeringhen ^p der vaderen.

o Oft, van myner oudde,

p Oft, mijns vaders.

15

^q Maer als het Gode (die my van mijns moeders ^r lichaem aen heeft afghescheyden, ende gheroepen door syne ghenade) behaecht heeft synen Sone ^s in my te openbaren,

q Actuum 9.b.15 ende 13.a.2

r Griecx, buycke

s Of, door

16

^t Om dat ick hem soude onder de Heydenen verkondighen: hebbe ick niet terstont my beraden ^u met vleesch ende bloet:

t Actuum 9.b.15 ende 13.a.2 ende 22.c.21 Galat. 2.a.8 Ephes. 3.a.8

u Matth. 16.b.17

17

Noch en quam niet wederom na Ierusalem, tot de ghene die voor my Apostelen [waren:] maer ick ghinck na Arabien, ende quam wederom na Damascum.

18

Daer na, na dry Iaren, quam ick te Ierusalem om Petrum te besien, ende bleef by hem vijfthien daghen.

19

Ende en hebbe niemant anders van de Apostelen ghesien, dan Iacobum den broeder des Heeren.

C.20

Dat ick v schrijue, siet ^x voor God ick en lieghe niet.

x Roman. 1.a.9 ende 9.a.1 2.Corinth. 1.c.25 ende 11.d.31 1.Thess. 2.a.5 1.Timothei 5.c.21. 2.Timothei 4.a.3

21

Daer na ghinck ick in de lantschappen Syrie ende Cilicie:

22

Ende ick was den Ghemeynten Christi in Iudea, onbekent na den aensichte:

23

Maer sy hadden alleenlick ghehoort, dat hy die voortijden ons veruolchde, nu het ghelooue predickt dat hy voortijden verwoest heeft.

24

Ende sy loefden God in my.