Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xiiij. Capittel.

Uan de onghetrouwicheydt ende schalckheyt der rijcken vrecken. Uermaninghe tot goede daden, ende tot de wijsheyt.

A.1

VVel ^a dien, die gheenen boosen raedt en gheeft, ende gheen boose consciencie daer van en heeft.

a Psalm. 1.a.1. Syrach. 19.b.16 ende 25.b.11. Iaco. 3.a.2.

[fol. 34v]

2

Wel dien, die gheen boose consciencie en heeft, ende zijn toeuerlaet hem niet ontuallen is.

3

^* Eenen Vrecken staet het niet wel, dat hy rijcke is: ⁺ ende wat sal gheldt ende goedt eenen Vrecken honde?

* Ca. xiiij. Lut.

+ Vander ontrouwe ende schalcheyt der rijcken vrecken.

4

^b Wie vele samelt, ende hemseluen niet goets en doet, die samelt het anderen lieden, ende andere lieden sullent verbrassen.

b Ierem. 17.b.11. Luc. 12.b.15.

5

Wie hemseluen niet goets en doet, wat soude die anderen lieden goet doen? hy en wort nemmermeer vrolick van synen goede.

6

Daer en is gheen schandelicker dinck, dan dat een hemseluen niet goets en gonnet, ende dat is de rechte plaghe voor zijn boosheyt.

7

Doet hy wat goets, so en weet hy ghewislick daer niets van, ende wordt ten laetsten onuerduldich daer ouer.

8

Dat is een boos mensche, die niet sien mach, datmen den lieden wat goedts doet, maer wendt zijn aenghesichte wech, ende en ontfermt hem niemandts.

9

^c Een onuersadelick mensche, laett hem nemmermeer met synen deele ghenoeghen, ende en kan van ghiericheyt niet ghedijen.

c Prou. 27.c.20.

B.10

Een nijdisch mensche siet niet gheerne eten, ende het doet hem wee, als hy sal eten gheuen.

11

Mijn kindt, doet dyseluen wat goedts van den dynen, ^d ende gheeft den Heere offeren, die hem toebehooren.

d Deut. 26.a.9.

12

Dencket, dat de doodt niet en vertoeft: ende du weetst doch wel, wat verbondt du met den doot hebst.

13

^e Doet den vriende wat goedts, voor dijn eynde, ende doet handtreyckinghe den armen, na dijn vermoghen.

e Syrach 4.a.1. Tob. 4.a.7. Luc. 14.b.13.

14

^f Vergheet der armen niet, als du eenen vrolicken dach hebst, so sal dy oock de vreuchde toekomen, die du begeerest.

f 3.Esd. 9.f.52.

15

Du moetst doch dijn suer sweedt anderen laten, ende dynen arbeyt, den erfghenamen ouergheuen.

16

^g Gheeft gheerne, ^h so saltu weder ontfanghen, ende ⁱ heylighet dijn ziele:

g 2.Corint. 9.a.7.

h Matt. 25.d.34.

i Geeft den Priesteren haer behoorlick offer, als dy de Wet heet.

17

want als du doodt bist, so hebstu wtgheteert.

18

^k Alle het vleesch verslijt, als een kleet: ^l want dat is dat oude Verbondt: Du moetst steruen.

k Iesai. 40.a.6. Iaco. 1.b.10. 1.Pet. 1.c.24. Psalm. 90.a.6.

l Eccl. 8.a.8 Heb. 9.c.27.

19

Gelijck als de groene bladeren op eenen schoonen boome, sommighe vallen af, sommige wassen weder: also gaet het met den lieden oock toe, ^m sommighe steruen, sommighe worden gheboren.

m Eccle. 3.a.3.

C.20

Alle vergancklick dinck moet een eynde nemen,

21

ende die daermede ommegaen, die varen oock mede wech.

22

^* Wel dien, ⁿ die altijdts met Gods woordt omgaet, ⁺ ende datselue wtleyt ende leert.

* Cap. xv. Lut.

n Deute. 6.a.7. Psalm. 1.a.2.

+ Lof der Wijsheydt. Psalm. 1.a.2.

23

Die het van herten ouerleyt, ende grondelick leert verstaen: ende na de Wijsheyt ^o altijdts verder verneemt, ende sluypt haer na, waer sy henen gaet.

o alwech wijder nasoecket,

24

Ende kijckt tot harer venster in, ende luystert voor haer deure.

25

Soeckt herberghe hardt by haren huyse, ende richtet aen hare wandt, syne hutte op.

26

^p Hy brenghet syne kinderen oock onder haer dack, ende blijft onder hare loueren.

p Tob. 1.a.2.

27

Daer wort hy voor der hitte onder beschermt, ende het is hem een heerlicke wooninghe.