Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)
(2009)–Anoniem Deux-Aes bijbel–
Auteursrechtelijk beschermd
[Folio 1r]
| |
DE BOECKEN GHENOEMT, APOCRYPHI.VVaerschouvvinghe tot den Leser. DEse Boecken diemen noemt APOCRYPHOS, hebben te allen tijde onderscheyden gheweest van de Boecken diemen sonder twijffelinghe acht te sijne van de Heylighe Schriftuere. Want de oude vaders willende toesien dat daer gheen onheylighe boecken en souden toeghelaten worden met de boecken die sonder twijffel zijn door den Heylighen Gheest gheschreuen, so hebben sy een Rolle ghemaeckt, de welcke sy ghenoemt hebben CANON, dat is Reghel, daermede te kennen gheuende, dat alle de boecken die daerin veruatet waren, waren een seker reghel, daer aen men hem houden moeste. Aengaende dese boecken, sy hebbense ghenoemt APOCRYPHOS, daermede te kennen gheuende, datmense moeste houden voor priuate ende eyghen gheschriften, ende niet voor Autentijck, ghelijck ghemeyne verseghelde ende gheapprobeerde brieuen. Daeromme is tusschen dese boecken ende de andere sulck onderscheydt, als tusschen eenen brief die voor eenen Notaris ghepasseert is, ende gheseghelt, om van allen menschen aengenomen te worden, ende tusschen eenen brief van eenen sonderlicken mensche gheschreuen. Het is wel waer dat sy niet te misprijsen en zijn, dewijle sy goede ende nutte leere veruaten. Maer het is nochtans wel recht, dat het ghene dat ons door den Heylighen Gheest ghegheuen is, gheacht ende ghehouden zy, bouen het ghene dat van menschen ghekomen is. [vignet:] HET RIKE DER HEMELEN IS ALS EEN VERBORGEN SCHAT IN DEN ACKER MATH 13 Ghedruckt, Anno. 1562. |
|