Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat vij. Capittel.

1. Den Priesteren wordt eene vraghe voorghestelt ouer den vasten ende leedtdraghen, 4. de Heere beantwoordetse door SacharIa, ende gheeft een vol bericht van den rechten vasten.

A.1

ENde het gheschiedde in den vierden Iare des Konincks Darij, dat des Heeren woordt gheschiedde tot SacharIa, in den vierden daghe der neghender maendt, welcke heet Chisleu,

2

Doe SarEzer ende RegemMelech, met tsamen haren lieden, sonden na BethEl, te bidden voor den Heere,

3

Ende lieten den Priesteren segghen, die daer waren rontomme het huys des Heeren Zebaoth, ende tot den Propheten: Moet ick ooc noch weenen ^a in der vijfster maendt ende my ^b onthouden, als ick nu sommighe Iaren, sulcx ghedaen hebbe?

a 2.Reg. 25.a.8.

b Als de Nazarei. Num. 6.a.1.

4

Ende des Heeren Zebaoth woordt geschiedde tot my, ende sprack:

5

Segghet allen volcken in den lande, ende den Priesteren, ende spreeckt: ^c Doe ghy vastedet ende leedt droeghet, in der vijfster ende ^d seuender maendt, dese tseuentich Iaer lanck: hebbet ghy my so gheuastet?

c Iere. 41.a.1. 2.Reg. 26.c.25.

d Iesa. 58.a.5.

6

Oft doe ghy atet ende droncket, hebbet ghy niet voor v selfs ghegheten ende ghedroncken?

7

Is het niet dat, dat de Heere predicken liet, door de vorighe Propheten, doe Ierusalem bewoonet werdt, ende hadde de volheydt, met tsamen haren steden rontomme, ende doe daer lieden wooneden, beyde teghent Suyden ende in den leechten?

8

Ende des Heeren woordt gheschiedde tot SacharIa, ende sprack:

9

So spreeckt de Heere Zebaoth: ^* Richtet recht, ende een yegelick bewijse aen synen broeder ^e vriendtlicheyt ende barmherticheyt.

* Sach. 8.b.16. Iesa. 1.b.17.c.25.

e Of, goedertierenheyt

B.10

^f Ende en doet niet onrecht den weduwen, weesen, vreemdelinghen ende armen: ende niemant en dencke tegen synen broeder wat quaets, in syner herten.

f Exod. 22.c.22. Iere. 6.c.28.

11

^g Doch sy en wouden niet opmercken, ende keerden my den rugghe toe, ende verstockeden hare ooren, op dat sy niet en hooreden:

g Iere. 2.c.27. ende 7.c.23.

12

Ende maecten hare herten, als eenen Diamant, op dat sy niet en hoorden de Wet ende woorden, ^h die de Heere Zebaoth sondt in synen Gheeste, door de vorige Propheten, daerom ooc sodanen grooten toorne, van den Heere Zebaoth ghekomen is.

h 2.Pet. 1.c.21.

13

Ende het is also gheschiedt, ⁱ als gepredicket werdt, ende sy niet en hooreden: so en woude ick oock niet hooren, doe sy riepen, spreeckt de Heere Zebaoth:

i Iere. 11.b.11. Prouer. 1.c.28. Iesa. 1.b.15.

14

Also hebbe ickse verstroyt onder alle Heydenen, die sy niet en kennen: ende het landt is achter hen woest ghebleuen, dat daer niemandt in en wandelt noch woonet, ende dat edele lant is tot eener woestijne ghemaeckt.

[fol. 81r]