Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iiij. Capittel.

1. Een ghesichte van den gulden luchter oft candelaer, ende tween olyboomen daerby, 5. met syner beduydinghe.

A.1

ENde de Engel die met my sprack, quam weder, ende weckede my op, als een van den slape opghewecket wordt.

2

Ende sprack tot my: Wat sietstu? Doch ick sprack: Ick sie, ende siet, daer stondt eenen candelaer, gantsch gulden, met eener schale daer bouen op, daer ^a seuen lampen aen waren, ende telcken seuen ^b† scheplepelen aen eener lampen.

a Apoc. 4.a.5.

b† And. vaten om te schencken

3

^c Ende twee olyboomen daerby, een ter rechter sijde der schale, de ander ter slincker sijde.

c Apoc. 11.a.4.

4

Ende ick antwoordde ende sprac tot den Enghel, die met my sprack: Mijn Heere, wat is dat?

5

Ende de Enghel die met my sprack, antwoordde ende seyde tot my: Weetstu niet wat dat is? doch ick sprack: Neen mijn Heere.

6

Ende hy antwoordde ende sprack tot my: Dat is het woordt des Heeren ^d† van SeruBabel, ^e Het en sal niet door een Heyr oft door kracht, maer door mynen Gheest gheschieden, spreeckt de Heere Zebaoth.

d† And. aen

e Iesa. 11.a.2.

7

Wie bistu, du groote berch, die doch voor SeruBabel een slicht veldt zijn moet? ende hy sal den eersten steen opbouwen, datmen roepen sal: Gheluck ende heyl, gheluck ende heyl.

8

Ende het woordt des Heeren gheschiedde tot my, ende sprack:

9

De handen SeruBabel, hebben dit huys gefondeert, syne handen sullent oock voleynden: ^f op dat ghy ghewaer wordet, dat my de Heere tot v ghesonden heeft.

f Deut. 18.c.22. Sach. 6.b.15.

B.10

Want wie is het, die de ^g slechte daghen verachtet? daermen hem doch sal inne verheughen, ende sien, de ^h thinnenmate in SeruBabels hant: met den seuen, welcke zijn des Heeren ooghen, die het gantsche landt doortrecken.

g Of, verachtede

h Richtsnoer oft richthout: want het ghebouwete soude door SeruBabel voorts gaen, wanneer ende waer hy het aengrepe, wanneert oock allen Heydenen leedt ware.

11

Ende ick antwoordde ende sprack tot hem: ⁱ Wat zijn de twee Olyboomen ter rechter ende slincker sijden des candelaers?

i Apoc. 11.a.4.

12

Ende ick antwoordde ten anderen mael: Wat zijn de twee ^k† tacken der Olyboomen, die daer staen by den tween gulden ^l keersnutters des gulden candelaers, daermen mede afneemt bouen van den gulden candelaer.

k† And. twijgen, oft spruyten. In Hebraico: Due spice.

l Of, lichtscheeren

13

Ende hy sprack tot my: Weetstu niet, wat die zijn? doch ick sprack: Neen mijn Heere.

14

Ende hy sprack: Het zijn de twee Olykinderen, die daer staen by den Heerschapper des gantschen landts.