Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den Cxxix. Psalm.

1. Een ghebet ende dancksegghinge, daer Gods wonderbaerlicke weldaden van synen volcke inne gheroemt worden, dat hy zijn Kercke int cruyce niet omkomen en late, maer haer alleweghe bescherme ende onderhoude.

A.1

Een liedt inden hooghen Choor. SY hebben my dickwils ghedronghen van myner ieucht op: so segghe Israel.

2

Sy hebben my dickwils ghedronghen van myner ieucht op, doch sy en hebben my niet ouermocht.

3

De ploeghers hebben op mynen rugghe gheackert, ende hare voren lanck ghetoghen.

4

De Heere die rechtueerdich is, heeft der Godloosen ^a reepen afghehouwen.

a Of, touwen

5

^b Och dat doch moesten te schanden worden, ende te rugge keeren, alle die Zion ^c gram zijn.

b Psalm. 37.a.2. 2.Reg. 19.c.25. Iesa. 37.c.27.

c Of, vyandisch, hatisch.

6

Och dat sy moesten zijn, als het gras op den daken, welck verdorret, eermen het wtpluckt.

7

Vanden welcken de maeyer zijn hant niet en vullet, noch de ^d garuenbinder synen arm vol.

d Of, schoouenbinder

8

Ende die voorby gaen, niet spreken: De segheninghe des Heeren zy ouer v: wy seghenen v inden Name des Heeren.