Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den Cxj. Psalm.

1. Een dancksegghinge voor de weldaden, den volcke Israels bewesen. Ende hy en vertelt niet alleen de weldaden, dat hy zijn volck ghespijst hebbe inder woestijne, dat hy hen ghegheuen hebbe het lant Canaan, 9. maer meldet oock des Nieuwen Testaments, dat een eewich Testament is, ende de verlossinghe door Christum gheschiet, veruatet.

A.1

Haleluia. ICk ^a dancke den Heere van gantscher herten, inden rade der vromen, ende inder Gemeynte.

a Syrach. 51.a.1. Psal. 9.a.1. ende 138.a.1.

2

^b Groot zijn de wercken des Heeren: wie harer achtet, die heeft enckel lust daer aen.

b Psalm. 92.a.6. ende. 106.a.2. Syrach. 43.e.42.

3

Wat hy ordineert, dat is louelick ende heerlick, ende zijn gherechticheyt blijft eewichlick.

4

Hy heeft een ghedachtenisse ghemaect syner wonderen, de ghenadige ende barmhertige God.

5

^c Hy gheeft spijse dien, die hem vreesen: hy gedenckt eewichlick aen zijn verbont.

c Psalm. 34.b.11. Gene. 15.b.18.

6

Hy laet verkondighen syne gheweldighe daden synen volcke, ^d dat hy hen gheue het erue der Heydenen.

d Psal. 105.e.44.

7

De wercken syner handen zijn waerheyt ende recht: alle syne gheboden zijn rechtschapen.

8

Sy worden ^e weerhouden altoos ende eewichlick, ende gheschieden trouwelick ende redelick.

e Of, stijf ghehouden, ondersteunt

9

^f Hy sendet een verlossinge synen volcke: hy geloeft, dat zijn Verbont eewichlick blijuen sal: Heylich ende Heerlick is synen Name.

f Psal. 105.d.37.

B.10

^g De vreese des Heeren, is der wijsheyt beginsel: dat is een schoone kloeckheyt, wie daer na doet: diens lof blijft eewichlick.

g Hiob. 28.c.28. Prouerb. 1.a.7. ende 9.b.10. Syra. 1.b.16.c.25.