Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den lxix. Psalm.

1. Een ghebet Christi aent cruyce met doodes smerten beangstet om onser sonden wille: Ende biddet om verlossinge syner Kercken haluen: als hy seyt: 7. Laet niet te schanden, etc. 23. Der Synagoge vloeckt hy ende verworptse. Ende dewijle het een sonderlinge prophecie is, heeft hy den Psalm eenen naem ghegheuen, van Lelien ende Roosen.

A.1

Eenen Psalm Dauids van den ^a† Roosen, voor te singhen.

a† And. Lelien oft Uioletten.

2

GOd help my, ^b want het water gaet my tot aen de ziele.

b Ione 2.a.6.

3

Ick versincke in diepen ^c slijm, daer gheenen gront is: ick ben in diepe wateren, ende de vloet wil my versuypen.

c Of, modder.

4

Ick hebbe my moede geroepen, mynen hals is heesch: ^d† het ghesichte vergaet my, dat ick so langhe moet harden op mynen God.

d† An. mijn oogen zijn besweken, verwachtende na mynen God.

5

Die ^e my sonder oorsake haten, dier is meer, dan ick hayrs op den hoofde hebbe: die my onbillicken vyant zijn, ende my verderuen, zijn machtich: ick moet betalen, dat ick niet gerooft en hebbe.

e Psalm. 35.b.19. Ioan. 15.c.25.

6

God du weetst myne dwaesheyt, ende myne schulden en zijn dy niet verborghen.

7

Laet niet te schanden worden aen my, die dyner verwachten Heere, Heere Zebaoth, laet niet schaemroot worden aen my, die dy soecken God Israels.

8

^f Want om dynent wille drage ick versmaetheyt, mijn aenghesicht is vol schanden.

f Matth. 10.c.22. ende 24.a.9.

9

^g Ick ben vreemt gheworden mynen broederen, ende onbekent myner moeder kinderen.

g Psalm. 88.a.9. Iob. 19.b.14.

B.10

^h Want ick ijuere my schier ter doot om dijn huys, ⁱ ende de smaedtheyt dier, die dy schenden, vallet op my.

h Psal. 119.o.139. Ioan. 2.b.19.

i Rom. 15.a.3.

11

Ende ick weene ^k ende vaste bitterlicken, ende men spottet myner daer toe.

k Ione. 3.a.5.

12

Ich hebbe eenen sack aenghetoghen, doch sy maken eenen spot daer wt.

13

Die in der poorten sitten, ^l wasschen van my, ende in den ghelaghen singtmen van my.

l Dat is, rellen etc. ende inden drincsitten of drinckgelagen, etc. Iob. 30.a.9.

14

Ick daerentegen bidde Heere tot dy, inden aengenamen tijt: God door dyne groote goedertierenheyt, verhoort my met dyner trouwer hulpe.

15

^* Verlost my wt den dreck, dat ick niet en versincke, dat ick verlost worde van mynen haters, ende wt den diepen water.

* Thren. 3.g.62. Hesek. 33.d.32.

16

Dat my de wateruloet niet en versuype, ende de diepte niet en verslinde, ende het hol der kuylen hem niet bouen my toe en doe.

17

Verhoort my Heere, want dyne goedertierenheyt is troostelick: keert dy tot my, na dyner grooter barmherticheyt.

18

Ende en verbercht dijn aenghesicht niet voor dynen knecht, want my is ^m angst: verhoort my haestelick.

m Of, banghe

19

Maect dy tot myner zielen, ende verlostse: verlost my om myner vyanden wille.

C.20

Du weetst myne smaedtheyt, schande ende schaemte: myne wedersakers zijn alle voor dy.

21

Den smaedt verbreeckt my mijn herte, ende krencket my: ick wachtede, ofte het yemanden iammerde, doch daer en was niemandt: ende op troosters, doch ick en vinde gheene.

22

ⁿ Ende sy gheuen my galle te eten, ende edick te drincken, in mynen grooten dorst.

n Matth. 27.e.48 Ioan. 19.c.28.

23

^o Haren disch moet voor hen ten stricke worden, tot vergheldinghe, ende tot eenen val.

o Dat is, Hare prediken ende leeren, daer sy hen mede vermeynen te spijsen. Act. 1.b.18. Rom. 11.a.9.

24

Hare ooghen moeten duyster worden, dat sy niet en sien: ende hare lendenen laet alleen slackeren.

25

Ghiet dijn onghenade op haer, ende dynen grimmighen toorn grijpese.

26

^p Hare wooninghe moet woest worden, ende daer en zy niemant, die in hare hutten woone.

p Act. 1.c.20. Matth. 25.d.38.

27

Want sy veruolgen dien du gheslagen hebst, ende roemen, dat du de dynen seer slaest.

28

Laetse in een sonde ouer de ander vallen, ^q dat sy niet komen tot dyner gherechticheyt.

q Dat is, En laet hen niets goet noch recht zijn.

29

Delchtse wt, ^r den boeck ^s der leuendigen, dat sy met den rechtueerdighen niet aengeschreuen worden.

r Exod. 32.d.32.

s Philip. 4.a.3. Apocal. 3.a.5. ende 20.b.12. ende 21.c.27.

D.30

Ick doch ben ellendigh, ende my is wee: God dijn hulpe beschutte my.

31

Ick wil den Name Gods louen met eenen liede, ende wil hem hooch eeren met dancke.

32

Dat sal den Heere beter beuallen, dan eenen osse, die hoornen ende klauwen heeft.

33

De ellendige sient, ende verblijden hen: ende die God soecken, dien sal het herte leuen.

34

Want de Heere hoort de armen, ende en veracht syne gheuanghenen niet.

35

^t Hem loue den Hemel, Aerde, ende Zee, ende alles dat hem daerin verruert.

t Psalm. 148.a.1.

36

Want God sal Zion helpen, ende de steden Iuda bouwen, datmen aldaer woone, ende die besitte.

37

^u Ende het zaet syner knechten sullense beeruen, ende die synen Name beminnen, sullen daer in blijuen.

u Prouerb. 2.c.21