Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den xxxi. Psalm.

1. Een ghebet, daer menigherley aenuechtinghen in ghespeurt worden, als nu dier, die God louen, nu wederom dier, die daer vertzagen ende God aenbidden, nu dier, die oock andere tot den gelooue verwecken ende stieren, etc. welcke verscheydenheyt eenen schoonen troost met hem brengt: want daer in sietmen, dat oock de Heylighen niet aloos euen ghelijcke vasticheyt en houden in de aenuechtinghen.

A.1

Eenen Psalm Dauids voor te singhen.

2

HEere ^a op dy betrouwe ick, en laet my nemmermeer te schanden worden: verlost my door dyne gherechticheyt.

a Psal. 7.a.2. ende 25.a.2. ende. 71.a.1. Syrach. 2.b.12.

3

Neycht dyne ooren tot my, haestelick helpt my: weest my eenen stercken rotzsteen ende borcht dat du my helpst.

4

Want du bist mijn rotzsteen ende mijn borcht: ende om dijns Naems wille, woudestu my doch leyden ende voeren.

5

^b Du woudest my doch wt den nette trecken, dat sy my ghestelt hebben: want du bist mijn sterckte.

b 1.Sam. 19.a.1. ende. 23.a.7.c.24.

6

^c In dyne handen beuele ick mynen gheest: du hebst my verlost Heere, du ghetrouwe God.

c Luc. 23.e.46. Actuum. 7.f.59.

7

Ick hate die daer houden op loose leere: ick hope doch op den Heere.

8

Ick verheughe my, ende ben vrolick ouer dyne ^d goetheyt: dat du mijn ellende aensiest, ende bekennest mijn ziele inder noot.

d Of, goedertierenheyt:

9

^e Ende en ouergeefst my niet in de handen des vyants: du stellest mijn voeten op wijde ruymte.

e 1.Sam. 23.c.26.

B.10

Heere zijt my ghenadich, want my is angst: mijn ghestalte is veruallen van trueren, daertoe mijn ziele, ende mynen buyck.

11

Want mijn leuen heeft afgenomen van droeffenisse, ende mynen tijt van suchten: mijn kracht is veruallen door mijn misdaet, ende mijn beenders zijn versmacht.

12

^f Het gaet my so qualick, dat ick ben een groote versmaedtheyt gheworden mynen nabueren, ende een schuywen mynen ^g magen: die my sien op der straten, vlieden voor my.

f Psalm. 44.b.14. ende. 79.a.1. Iere. 20.b.10.

g Of, vrienden, of, gemeynsamen:

13

Myner is vergheten inder herten, als eens dooden: ick ben gheworden als een gebroken vat.

14

Want vele schelden my qualick, dat yegelick hem voor my schuywet: ^h sy raedtslaghen met malcanderen ouer my, ende dencken my het leuen te nemen.

h 2.Sam. 17.a.1.

15

ⁱ Ick dannoch Heere hope op dy, ende spreke: Du bist mijn God.

i Psalm. 25.a.2.

16

^k Mynen tijt staet in dyne handen: verlost my vander hant myner vyanden, ende van dien, die my veruolghen.

k Iob. 14.a.5.

17

Laet dijn aengesicht lichten ouer dynen knecht: helpt my door dyne ^l goetheyt.

l Of, goedertierenheyt.

18

^m Heere, en laet my niet te schanden worden, want ick roepe dy aen: de Godloosen moeten te schanden ende verstommet worden, inder Hellen.

m Psalm. 25.a.2.

[fol. 183r]

19

Verstommen moeten de valsche monden, die daer spreken teghen den rechtueerdighen, stijf, stout ende ⁿ schimpich.

n Of, met schamper versmadinge.

C.20

Hoe groot is dyne goedertierenheyt, die du verborgen hebst dien, die dy vreesen, ende verthoonest het dien, die voor den lieden op dy betrouwen.

21

Du verberghestse heymelick by dy, voor yeghelicx ^o trotz: du verdeckestse in der hutten, voor den twistischen tonghen.

o Of, ouermoedicheyt.

22

Gheloeft zy de Heere, dat hy heeft een wonderlicke goedertierenheyt my bewesen, ⁺ in eener vaster stadt.

+ Een vaste stadt, heet alderley sekerheyt.

23

Want ick sprack in mynen vertzaghen, Ick ben van dynen oogen verstooten: dannoch hoordestu mijns smeeckens stemme, doe ick tot dy schreydde.

24

Bemint den Heere alle zijn Heylighen: de gheloouighe behoedt de Heere, ende vergeldet rijckelicken, dien, die hoochmoedt oeffent.

25

^p Weest getroost ende onuertzaecht, alle ghy die des Heeren verbeydet.

p Psal. 27.b.14.